Túrkistan oblysynyń medıtsına qyzmetkerlerine MÁMS júıesi túsindirildi

TÚRKІSTAN. QazAqparat – Túrkistan qalalyq emhanasynda medıtsına qyzmetkerlerine oqytý semınary ótti. QR Densaýlyq saqtaý mınıstrliginiń jobalyq top jetekshileri óńirdiń sala mamandaryna dáris berip, mindetti áleýmettik medıtsınalyq saqtandyrý júıesiniń mańyzdylyǵyn túsindirdi, dep habarlaıdy QazAqparat tilshisi.

Semınarǵa qatysqan mamandarǵa azamattardy medıtsınalyq saqtandyrý tártibi men kómektiń eki túrli paketi boıynsha aqparat berildi. Mamandardyń sózinshe, medıtsınalyq júıe konsýltatıvtik-dıagnostıkalyq kómek pen baǵasy qymbat bolyp keletin zerthanalyq qyzmet túrlerin, syrqattardy dári-dármekpen qamtamasyz etý men josparly statsıonarlyq jáne ony almastyratyn kómekpen qamtýdy kózdeıdi.

Sondaı-aq, saqtandyrý júıesinde medıtsınalyq ońaltý jáne patsıent densaýlyǵyn qalpyna keltirýge baǵyttalǵan em-dom túrleri qarastyrylǵan. Jumyskerdiń tabys mólsheri qansha bolsa da tolyq medıtsınalyq kómek alýǵa múmkindik beredi.

«Al, jumysqa resmı túrde ornalaspaǵan, jeke kásipker retinde tirkelmegen, azamattyq-quqyqtyq sıpattaǵy kelisimshart boıynsha qyzmet kórsetpeıtin azamattar derbes tólem jasaýshylar sanatyna jatady. Sondyqtan mindetti áleýmettik saqtandyrý júıesine qatysý úshin olar biryńǵaı jıyntyq tólem jasaýy qajet. Mindetti medıtsınalyq saqtandyrýǵa qatysty suraqtar boıynsha biryńǵaı 1406 nómiri boıynsha aqparat alýǵa bolady», - dedi semınarda dáris bergen mamandar.