Túrkistan oblysynyń mashına jasaý salasyna ınvestıtsııa tartylmaq
«Ýral» avtomobıl zaýyty men «Ýral» AZ saýda úıiniń basshylyǵymen kezdesý barysynda taraptar Túrkistan oblysynda «Ýral» brendimen júk avtomobılderi men arnaıy tehnıkany qurastyrýdy uıymdastyrý múmkindigin talqylady. Túrkistandyq delegatsııa jańa tehnologııalyq sheshimder men ekonomıkany ǵana emes, óńdeý ónerkásibin, atap aıtqanda, avtomobıl jasaý salasyn damytý boıynsha ozyq álemdik tájirıbeni engizýge erekshe mán berdi.
«Kóp jylǵy tájirıbeni, sondaı-aq avtomobıl zaýytynyń aıryqsha ımıdjin eskere otyryp, biz olardy óńirdiń ınvestıtsııalyq múmkindikterimen tanysý úshin Túrkistan qalasyna shaqyrdyq. «Ýral» kompanııasynyń ókilderi joǵary qyzyǵýshylyq tanyta otyryp, aǵymdaǵy jyldyń aqpan aıynyń ekinshi jartysynda bizdiń óńirge jumys saparymen kelýge sheshim qabyldady. Sonymen qatar, biz Chelıabi oblysy gýbernatorynyń orynbasary Egor Kovalchýkpen kezdesý ótkizdik. Úkimet músheleriniń qatysýymen ótken jıyn kezinde biz óńirlerimiz arasynda saýda-ekonomıkalyq qatynastar ornatý máselelerin ortaǵa saldyq»,- deıdi oblys ákiminiń orynbasary Meıirjan Myrzalıev.
Aıta keteıik, Reseı-Qazaqstan qatynastary kóptegen salalarda qarqyndy damýda. Bul sapar Túrkistan óńirinde mashına jasaý salasynyń damýyna jańa serpin berdi. Negizgi maqsat ekijaqty strategııalyq seriktestikti odan ári nyǵaıtýǵa jáne Chelıabi oblysymen tyǵyz saýda-ekonomıkalyq qarym-qatynas ornatýǵa baǵyttalǵan.
