Túrkistan oblysynyń Maqtaaral aýdanynda «Halyqtyq Kense» jumysyn bastady
TÚRKІSAN. QazAqparat - Túrkistan oblysyna qarasty Maqtaaral aýdanynda Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasynyń negizinde turǵyndar úshin tıimdi qyzmet túrin kórsetetin «Servıstik ákimdik» ashyldy.
QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı men aýdan ákiminiń orynbasary Beısenbaı Tórebekov halyqtyq keńseniń qyzmet kórsetý barysyn baqylady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Ashyq keńistiktegi jańa nysanda 8 derbes bólimder bar. Atap aıtsaq, bilim, jer qatynastary, aýyl sharýashylyǵy, turǵyn-úı kommýnaldyq sharýashylyǵy, jolaýshylar kóligi, ekonomıka jáne qarjy, sáýlet jáne qala qurylysy, jumyspen qamtý jáne áleýmettik baǵdarlamalar bólimi boıynsha 90 memlekettik qyzmet túri kórsetilip, turǵyndardyń kedergisiz qyzmet alýyna jaǵdaı jasalǵan.
Sondaı-aq, munda elektrondy termınal arqyly kezek alý, anyqtama buryshy, elektrondy qyzmet kórsetý, kútý zaldary jumys isteıdi. Jáne de «Ózine-ózi qyzmet kórsetý buryshymen» jasaqtaldy.
Halyqtyq keńsede elektrondy tsıfrlyq qoltańba alýǵa, «e-gov» qyzmeti arqyly anyqtamalardy alý, járdemaqy taǵaıyndaýǵa ótinish, úı kezegine tirkelý, jer, úı qujattaryn zańdastyrý jáne halyqqa qyzmet kórsetý ortalyǵyna bron jasaýǵa járdem beretin barlyq qolaıly jaǵdaılar qarastyrylǵan.
