Túrkistan oblysynyń Maqtaaral aýdanynda agroónim kólemi 42 mlrd teńgege jetti
MAQTAARAL. QazAqparat - Túrkistan oblysyndaǵy Maqtaaral aýdanynyń negizgi ekonomıkasyn aýyl sharýashylyǵy quraıdy. Ótken jyldyń qorytyndysy boıynsha aýdandaǵy jalpy aýylsharýashylyq óniminiń kólemi 42 mlrd teńgege jetti. Onyń ishinde ósimdik sharýashylyǵy 32,2 mlrd teńge, mal sharýashylyǵy 9,6 mlrd teńge, aýylsharýashylyq qyzmeti 278 mln teńgeni qurady, dep habarlaıdy QazAqparat.
Túrkistan oblysy ákiminiń baspasóz qyzmetinen málim etkendeı, Maqtaaral - aq altynnyń otany. Jergilikti dıqandar 60 926,3 gektar jerge egistik ekse, onyń 38 593,2 gektary maqta daqylyna tıesili. Aýdan boıynsha 96 511,6 tonna aq altyn jınalyp, ortasha ónimdilik 25 tsentnerdi quraǵan. Bul ótken jylmen salystyrǵanda 4 tsentnerge artyq.
Reseılik jáne eýropalyq kásipkerlerdiń sózinshe, álemdegi eń tátti qaýyn-qarbyz Maqtaaralda ósedi. Buǵan dálel, qaýyn-qarbyz tıelgen 200-300-ge jýyq kólik maýsym kezinde kún saıyn TMD jáne Prıbaltıka elderine, Túrkııa, Germanııa jáne Mysyrǵa jóneltilip otyrdy. Bıyl maqtaly ólkede 316 366,5 tonna baqsha ónimderi óndirildi. Sondaı-aq, maqtaaraldyqtar kúrish ósirýdi de sheber meńgergen. Bıyl 9 104,4 tonna kúrish qambaǵa jınaldy.
Aýdanda uzyndyǵy 1140,2 shaqyrymdy quraıtyn 532 kanal, jalpy uzyndyǵy 840,7 shaqyrymdyq 288 sý qashyrtqysy jumys isteıdi. Sondaı-aq, jalpy sany 339 tik drenajdy uńǵymalar bar.
