Túrkistan oblysynyń Leńgir qalasynda Oqýshylar úıi salynady
TÚRKІSTAN. QazAqparat – Túrkistan oblysy Tólebı aýdanynyń ortalyǵy Lengir qalasynda 80 oryndyq oqýshylar úıi boı kóteredi. Byltyr zamanaýı jańa ǵımarattyń jobalaý jumystaryna tapsyrys berilgen. Bul týraly Óńirlik kommýnıkatsııalar qyzmetinde málim etildi, dep habarlaıdy QazAqparat.
Bıyl «Jumyspen qamtýdyń jol kartasy» baǵdarlamasy aıasynda nysannyń qurylys-montajdaý jumystaryn qarjylandyrý qoldaý taýyp otyr. Oqýshylar úıinde jeńil atletıka, erkin kúres, qolóner baǵytynda «músinshi», «tiginshi» jáne tildik baǵytta «ónerli bala» úıirmeleri jumys isteıtin bolady.
Aıta keteıik, eski aýdandyq oqýshylar úıiniń ǵımaraty 1937 jyly shahta jumysshylary úshin jataqhana retinde salynǵan. Soǵys jyldarynan keıin ǵımarat qalalyq №7 bastaýysh mektebine, 1960 jyldan bastap №5 orta mektebiniń bastaýysh synyp oqýshylary úshin berilgen. Al, 2010 jyldan beri aýdandyq oqýshylar úıi retinde qoldanysta. Onda oqýshylarǵa úıirme jumysyn júrgizýge ǵımarattyń bólmeleri jetkiliksiz bolǵan. Sondyqtan zaman talabyna saı oqýshylar úıi boı kótermek. Jańa bilim uıasy Tólebı aýdany oqýshylarynyń bilim kókjıegin keńeıtýge sep bolary anyq.
