Túrkistan oblysynyń qurylýy aımaqtaǵy damý sapasyn jaqsartady - QSZI dırektory
ASTANA. QazAqparat - Shymkent qalasynyń respýblıkalyq qala atanýy jáne oblys ortalyǵynyń Túrkistan qalasyna kóshirilýi aımaqtaǵy ózge de eldimekenderdiń damýyna yqpal etedi.
Bul pikirdi QR Prezıdenti janyndaǵy Qazaqstan strategııalyq zertteýler ınstıtýtynyń dırektory Zarema Shaýkenova bildirdi, dep habarlaıdy QazAqparat tilshisi.
«Bıylǵy aqpan jáne maýsym aılarynda Qaýipsizdik Keńesinde óńirlik damý máseleleri qaralǵan bolatyn. Onda Ońtústik Qazaqstan oblysynyń halyq tyǵyz qonystanǵan bóliginde jańa aýdandar qurý sheshimi qabyldandy. Jańa aýdandar - Jetisaı jáne Keles Maqtaaral jáne Saryaǵash aýdandarynan bólinip shyqty. Al sáýir aıynda Almaty oblysynda Kegen aýdany quryldy. Ózin-ózi jumyspen qamtýdy qysqartý, eńbek resýrstaryn mobıldikpen qamtamasyz etý jáne jappaı kásipkerlik sharalarymen birge bul aýmaqtyq damý men resýrstyq áleýetti basqarý sapasyn jaqsartady», - dep eske saldy Instıtýt dırektory.
Sonymen qatar, Túrkistan oblysynyń qurylýy «Rýhanı jańǵyrý» baǵdarlamasymen de mándes bolyp otyr.
«Túrkistan - Qazaqstannyń rýhanı astanasy. Túrkistan oblysynyń qurylýy - ata-babalardyń muralary arqyly jetken rýhanııattyń Qazaqstan úshin mańyzdy ekendiginiń belgisi. Árıne, sımvoldyq aspektilerden bólek, oblys ortalyǵyn Túrkistanǵa aýystyrý Ońtústik óńir aýmaǵyna óndiristik jáne ekonomıkalyq kúshterdi damytýǵa múmkindik beredi. Shymkent qalasy ózin-ózi qamtamasyz etetin dárejege jetti, is júzinde respýblıkalyq mártebege laıyq boldy. Endi bul zańdy túrde bekitildi», - dep óz sózin tolyqtyrdy Z. Sháýkenova.
Onyń aıtýynsha, endigi kezekte burynǵy Ońtústik Qazaqstan oblysyndaǵy Aşysaı, Kentaý syndy kishi qalalardy da damytýdy qolǵa alý kerek.
Eske sala ketsek, 19 maýsym kúni QR Prezıdenti Nursultan Nazarbaev «Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly» Jarlyqqa qol qoıdy.
Jarlyqqa sáıkes, Shymkent qalasy respýblıkalyq mańyzy bar qalalar sanatyna jatqyzyldy. Ońtústik Qazaqstan oblysynyń ákimshilik ortalyǵy Shymkent qalasynan Túrkistan qalasyna kóshirilip, Túrkistan oblysy dep ózgertildi.
Foto: www.kisi.kz
