Túrkistan oblysynyń Keles aýdanynda Ortalyq stadıon jańartylýda
KELES. QazAqparat – Túrkistan oblysyna qarasty Keles aýdanynda «Aýyl – el besigi» baǵdarlamasy aıasynda 25 nysandy salý jáne kúrdeli jóndeýden ótkizý josparlanǵan. Sol nysandardyń biri - Ortalyq stadıon bıyl qaıta jańartylýda, dep habarlaıdy QazAqparat tilshisi.
Keles aýdanynyń ákimi Aqmentaı Esbaev búgin Ortalyq stadıondaǵy qurylys jumystarynyń barysymen tanysty. Búgingi tańda №1 Balalar jasóspirimder sport mektebine qaraıtyn sport kesheniniń kúrdeli jóndeý jumystaryn «Qýat Qurylys» JShS qarqyndy júrgizýde. Kompanııa jumysshylary kórermender otyratyn sektorlardyń tóbesin jabý úshin qurylǵylar ornatyp, arnaıy jaryq shamdar qoıýda. Sonymen qatar úlken alań janynan ústi jabyq, zamanaýı úlgidegi kishi fýtbol alańynyń qurylysy qatar júrýde. Dene shynyqtyrý jattyǵýlaryna arnalǵan arnaıy street workout qurylǵylaryn ornatý jumystary da qarqyn alǵan. Qurylysty aıaqtaý qazan aıynyń sońyna josparlanǵan. Sala mamandarynyń sózinshe, sport alańyna arnaıy jaryqshamdar qoıylady. Sóıtip túngi ýaqytta da sportpen shuǵyldanýǵa múmkindik týady. Qurylys jumystarynyń barysymen tanysqan aýdan basshysy tıisti merdiger mekemege qurylys jumystaryn sapaly ári sportpen shuǵyldanatyn azamattarǵa yńǵaıly etip jasaýdy tapsyrdy. Kórermender otyratyn oryndyqtardyń artyna jaıǵasqan sýaǵardy durystap jasaý kerektigin eskertti. Sport alańynyń kózge kórinetin tusyna jastardy sportqa baýlıtyn kórneki sýretterdi salý kerek ekenin aıtyp, jaryq shamdardyń sapalysyn ornatýdy eskertti.
