Túrkistan oblysynyń Keles aýdanynda kókpardan chempıonat ótti

Jarysty «Nur Otan» partııasynyń oblystyq fılıaly men oblystyq dene shynyqtyrý jáne sport basqarmasy, ulttyq sport túrlerinen balalar men jasóspirimder sport mektebi jáne «Kókpar» federatsııasy uıymdastyrdy, dep habarlaıdy QazAqparat tilshisi.

«Jeńistiń 75 jyldyq» merekesine arnalǵan chempıonatqa 2003-2005 jyly týǵan jasóspirimder qatysty. Sporttyq sharada Keles, Jetisaı, Saıram, Ordabasy, Shardara, Saryaǵash jáne Túlkibas aýdandarynyń komandalary baq synady. Jarystyń ashylý saltanatynda Keles aýdanynyń ákimi Aqmentaı Esbaev pen oblystyq «Kókpar» federatsııasynyń prezıdenti Nurmahan Joldasov quttyqtaý sóz sóılep, jas shabandozdarǵa sáttilik tiledi.

Ónerli jastarǵa attarynyń tuıaǵy súrinbeı, jarysta myqty komanda jeńimpaz bolsyn, degen jyly lebizin bildirdi. Tartysty ótken jarystyń qortyndysymen júldeli úshinshi oryndy Jetisaı aýdany, ekinshi oryndy Keles aýdanynyń quramasy ıelendi.

Ordabasy aýdanynyń quramasy týrnır jeńimpazy atandy. Júldeli oryn alǵan komandalar men úzdik dep tanylǵan shabandozdar jáne jarysty uıymdastyrýǵa qol ushyn bergen azamattar alǵys hattarmen marapattaldy.

Oblystyq dene shynyqtyrý jáne sport basqarmasynyń, «Kókpar» federatsııasynyń gramotalary men syılyqtary tapsyryldy.