Túrkistan oblysynyń Keles aýdanynda «Bilim ortalyǵy» ashyldy

KELES. QazAqparat – Túrkistan oblysy Keles aýdanynda Tuńǵysh Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasy jáne «Tsıfrlyq Qazaqstan» baǵdarlamasyndaǵy basty mindetterdi iske asyrý úshin «Bilim ortalyǵy» ashyldy, dep habarlaıdy QazAqparat tilshisi.

Jastar resýrstyq ortalyǵynda ashylǵan ortalyqta arnaıy ınternet jelisine qosylǵan noýtbýkte jumys istep, shahmat oınaýǵa bolady. Sondaı-aq, arnaıy kofe-breık uıymdastyrylǵan.

Qazaqstannyń Tuńǵysh Prezıdenti – Elbasy Nursultan Nazarbaevtyń «Rýhanı jańǵyrý» baǵdarlamasynyń negizgi baǵyttarynyń biri – halyqtyń bilimge degen qushtarlyǵyn arttyrý. Osyǵan oraı, «Nur Otan» partııasy «Qazaqstan kitaphanalary – zamanaýı bilim ortalyqtary» jobasy aıasynda kitaphanalardyń qyzmetin jańǵyrtyp, olardy jańa zamanǵa saı coworking-ortalyq retinde qaıta qurýdy qolǵa aldy.

Kovorkıng sózi aǵylshyn tilinen aýdarǵanda «birge jumys isteý» degendi bildiredi. Kovorkıng – kompıýterlik tehnıkamen tolyq jabdyqtalǵan jumys oryndarynyń jıyndyǵy sanalady. Atalǵan jobanyń maqsaty barlyq sanattaǵy oqyrmandardyń aqparattyq qajettilikterin jedel qanaǵattandyrý úshin úzdik álemdik tájrıbeni paıdalanyp, kitaphanalardyń jańa zamanaýı úlgisin qurý bolyp otyr.

Aıta keteıik, alǵashqy kovorkıng ortalyǵy 2005 jyly AQSh-ta ashylǵan. Al, Reseı men TMD elderinde kovorkıng sońǵy bir-eki jylda ǵana enip otyr.