Túrkistan oblysynyń Keles aýdanynda ákimshilik-iskerlik ortalyq salynady
TÚRKІSTAN.QazAqparat - Túrkistan oblysynda jańadan qurylǵan Keles aýdanynda ishki ónim kólemi 46,9 mlrd teńgege jetken. 142 myńnan asa halqy bar aýdanda jańa ákimshilik-iskerlik ortalyǵy men kópqabatty turǵyn úıler salynady.
Bul týraly búgin óńirdiń áleýmettik-ekonomıkalyq damýynyń 2018 jylǵy qorytyndysy jáne aldaǵy turǵan mindetteri týraly esep bergen aýdan ákimi Aqmetnaı Esbaev aıtyp ótti, dep habarlaıdy QazAqparat tilshisi.
Aqmetnaı Esbaevtyń sózinshe, ótken jyly aýdan ortalyǵy Abaı aýylynyń bas jospary bekitilgen. Munda 90 gektar jerge úsh jáne bes qabatty úıler salý jáne káriz júıesin júrgizý josparlanýda. Búginde bul jerlerdi jeke sharýa qojalyqtarynan zańǵa sáıkes memleket muqtajdyǵyna alý máselesi sheshilýde. Osy maqsatta aýdanda maqsatsyz paıdalanylmaı otyrǵan jaıylym jáne kommertsııalyq jáne sýarmaly jerler anyqtalyp, memleket qoryna alynyp jatyr.
«Qazir aýdanda eshqandaı úıdiń qurylysy júrgizilip jatqan joq. Degenmen birqatar aýyldyq okrýgterde jastarǵa, jas mamandarǵa 10 páterli úıler salý jaǵy qarastyrylyp jatyr. Sondaı-aq, aýdan ortalyǵynda 32 gektar jerge ındýstrıaldy aımaq qurý usynyldy. Ol jerlerge ınfraqurylym júrgizý úshin jobalyq smetalyq qujattama jasalýda. Sol sııaqty agro ındýstrıaldy aımaq salynady. Onda kókónis saqtaý qoımalary men qaıta óńdeý, kókónis ónimderin qabyldaý pýnktteri ashylady»,- dedi Keles aýdanynyń ákimi Aqmentaı Esbaev.
