Túrkistan oblysynyń keden beketterinde 64 mln teńgeniń zańsyz taýarlary tárkilendi
TÚRKІSTAN. QazAqparat – Túrkistan oblysynyń keden beketterinde sońǵy bir aıda 64 mıllıon teńgeniń zańsyz taýary tárkilengen. Bul týraly Túrkistan oblysy boıynsha Memlekettik kirister departamentinen málim etti, dep habarlaıdy QazAqparat tilshisi.
Atalǵan faktiler boıynsha «Ekonomıkalyq kontrabanda» babymen birneshe qylmystyq is qozǵalǵan.
Departament qyzmetkerleri kezekti tekserý kezinde «Saryaǵash» stansasynda temirjol vagonynan jeńil avtokólikterge arnalǵan 954 dana shınany anyqtaǵan. Olardyń jalpy quny - 34 mln teńgeden astam. Al taýardyń kedendik qujattary bolmaı shyqqan.
Sondaı-aq vedomstvo qyzmetkerleri 30 mln teńgeniń taýaryn alyp ótý áreketiniń jolyn kesken. Departament qyzmetkerleri Qytaıdan kelgen vagonnan salmaǵy 12,5 tonna deklaratsııalanbaǵan halyqtyq tutyný taýaryn tapqan. Sheteldik kásipkerler kedendik shekara arqyly qujattaryn rásimdemeı, taýarlaryn zańsyz alyp ótpek bolǵan. Júkterdiń arasynda avtokólikterge arnalǵan 40 shına men 220 dana elektrondy sorǵy, 40 rezeńke kamera men tigin mashınalaryna arnalǵan 36 dana elektrondy motorlar bar. Sondaı-aq 10 975 dana jaryqtandyrǵysh qurylǵy men 47 400 dana toqyma buıymdar bolǵan.
«Barlyq derekter boıynsha jınalǵan materıaldar qylmystyq is qozǵaý úshin Túrkistan oblysynyń Ekonomıkalyq tergeý departamentine ótkizildi», - delingen aqparatta.
