Túrkistan oblysynyń qaýipti aımaqtarynda sýdan qutqaratyn ýaqytsha beketter ashyldy
ShYMKENT. QazAqparat - Túrkistan oblysynyń qaýipti aımaqtarynda sýdan qutqaratyn ýaqytsha beketter ashyldy. Bul sharalar halqy tyǵyz ornalasqan Saryaǵash, Otyrar aýdandarynda sýǵa batý jaǵdaılarynyń aldyn alýǵa baǵyttalyp otyr. Óńirdiń TJD qyzmetkerleri óńirlik kommýnıkatsııalar qyzmetinde ótken brıfıngte osy máseleni sóz etti, dep habarlaıdy QazAqparat tilshisi.
Oblystyq tótenshe jaǵdaılar departamentiniń bólim bastyǵy Talǵat Dosalıevtiń sózinshe, óńirdegi sý aıdyndarynda jalpy sany 400-den astam reıdtik shara júrgizilgen. Sýdaǵy jazataıym oqıǵalar bolýy múmkin qaýipti aımaqtardy anyqtaý boıynsha jumystar tolyq atqarylǵan. Sonyń nátıjesinde bas-aıaǵy 722 myńnan asa halyq qonystanǵan 158 qaýipti aımaq anyqtalyp otyr.
«Jazataıym oqıǵalardyń aldyn alý úshin qaýipti sý aıdyndarynda shomylýǵa tyıym salynǵanyn eskertetin 200-den astam taqtaısha ornatyldy. Sonymen birge, úgit-nasıhat jumystary kúsheıtilgen túrde júrgizilýde. «Qaýipsiz jaz», «Jaz. Qaýipsizdik-2018» aktsııalary, reıdter uıymdastyrylyp, «Jas Otan» jastar qanatynyń jáne «Bizben birge» kóshbasshylar mektebiniń 500-den asa eriktileri úgit-nasıhat jumystaryna tartyldy. «Sýdaǵy qaýipsizdik» taqyryby boıynsha jadynama taratylyp, 167 bılbord ornatylǵan», - dedi Talǵat Dosalıev.
Budan bólek, tótenshe jaǵdaılar qyzmetkerleri bilim basqarmasymen birlesip, jazǵy saýyqtyrý lagerlerinde arnaıy dárister ótkizgenin aıtady. Olar jetkinshekterge «Sýdaǵy qaýipsizdik», «Alǵashqy medıtsınalyq kómek kórsetý», «Turmystaǵy qaýipsizdik» máselelerin túsindirgen. Mundaı kezdesýler jazǵy demalystyń sońyna deıin jalǵasady.
