Túrkistan oblysynyń kásiporyndaryna eksporttyq shyǵynnyń bir bóligi óteledi
TÚRKІSTAN. QazAqparat – Túrkistan oblysynda eksporttaýshy kásiporyndarǵa shyǵyndarynyń bir bóligi óteledi, dep habarlaıdy QazAqparat óńir ákiminiń baspasóz qyzmetine silteme jasap.
Eksporttaýshylar memlekettik qoldaýdyń qarjylyq sharalaryn alýǵa ótinimdi bıylǵy 1 maýsymǵa deıin bere alady.
«Túrkistan oblysy boıynsha ótken jyldyń qorytyndysyna sáıkes QazIndustry kompanııasy tarapynan «eńbek ónimdiligin arttyrý» baǵyty sheńberinde 69 kásiporynnan 779,15 mln teńgege 122 ótinimniń shyǵyndary óteldi. Al «otandyq óńdelgen taýarlardy syrtqy naryqtarǵa jyljytý» baǵyty boıynsha 139 kásiporynnan 3,9 mlrd teńgege 179 ótinimniń shyǵyndary óteldi. Onyń 3,5 mlrd teńgesi taýarlardy jetkizýge baılanysty shyǵyndar jáne 350,5 mln teńgesi taýarlardy jyljytýǵa arnalǵan shyǵyndar boıynsha. Naqty alýshylar týraly aıtatyn bolsaq, 2019 jyly Túrkistan oblysy boıynsha shyǵyndaryn ótegen kásiporyndar: «Kentaýlyq transformatorlyq zavod» AQ shetelde kórmege qatysý boıynsha shyǵyndaryn ótegen, «Asyl-LTD» JShS ónimdi eksporttaý kezinde kólik shyǵyndaryn ótegen, «KTZ» AQ basqarý júıesin avtomattandyrý boıynsha shyǵyndardy ótedi», - delingen aqparatta.
Málim etilgendeı, QazIndustry QR Indýstrııa jáne ınfraqurylymdyq damý mınıstrliginiń eńbek ónimdiligin arttyrý boıynsha jáne QR Saýda jáne ıntegratsııa mınıstrliginiń otandyq óńdelgen taýarlardy syrtqy naryqqa jyljytý boıynsha operatory bolyp tabylady.
«Kompanııa eksporttaýshylarǵa óńdelgen taýarlardy shetelde jarnamalaýǵa, sheteldik kórmelerge, jármeńkelerge, festıvaldarǵa tikeleı qatysýǵa; shetel tilderine aýdarýǵa jáne mamandandyrylǵan katalog shyǵarýǵa, ónimdi shetelde sertıfıkattaýǵa, qoımany, saýda úı-jaılaryn jalǵa alýǵa baılanysty ketken shyǵyndaryn óteıdi. Eleýli sharalardyń biri – kólik shyǵyndarynyń bir bóligin óteý», - dedi oblys ákimdiginen.
Kompanııa qyzmetkerleriniń aıtýynsha, búginde memlekettik qoldaý sharalaryn barlyq sanattaǵy óńdeýshi ónerkásip kásiporyndary – ShOB pen iri bıznes paıdalana alady. Biraq naqty talaptar bar. Mysaly, eńbek ónimdiligin arttyrýǵa baılanysty ketken shyǵyndardyń bir bóligin qaıtaryp alý úshin kásiporyn qyzmetin ekonomıkanyń basym sektorlarynda keminde 1 jyl júzege asyrýy qajet.
Al eksporttyq shyǵyndardy ótegisi keletinder otandyq óńdelgen taýarlardy óndirýshi bolýy nemese óndirilgen ónimdi ótkizetin onyń enshiles kompanııasy bolýy qajet.
Koronavırýs pandemııasy men iri qalalarda karantın engizýden týyndaǵan eldegi qalyptasqan epıdemıologııalyq jaǵdaıǵa baılanysty, ónerkásip kásiporyndarynyń qyzmeti tolyq nemese ishinara toqtatyldy, al shyǵyndardy óteý kásipkerlik sýbektileriniń qarjylyq shyǵyndaryn azaıtýǵa múmkindik beredi. Sondyqtan mamandar barlyq kásipkerlerge shyǵyndardy óteýge ótinim berýdi usynýda.
