Túrkistan oblysynyń kásipkerleri koronavırýsqa qarsy kúreske qarjy aýdarýda

NUR-SULTAN. QazAqparat - Jýyrda Elbasy bastamasymen «Nur Otan» partııasy «Biz birgemiz!» aktsııasyn bastaǵany belgili. Osyǵan oraı elimizdiń iri kásipkerleri arnaıy qorǵa qomaqty qarajat aýdaryp úlgerdi. Bul ıgi bastamaǵa Túrkistan oblysynyń kásipkerleri men oblystyq máslıhat depýtattary da aıryqsha úles qosýda, dep habarlaıdy «Nur Otan» partııasy Túrkistan oblystyq fılıalynyń baspasóz qyzmeti.

Belgili kásipker, oblystyq máslıhattyń depýtaty Serikjan Seıitjanov respýblıkalyq qorǵa 100 mln. teńge aýdarǵany habarlandy. Ózge kásipkerler de óńirlik qorǵa úles qosyp, qaýipti indetke qarsy kúres júrgizýge, eldiń ál-aýqatyn kóterýge atsalysýda. Máselen, «Qaıyp ata» JShS-niń dırektory Syrym Ertaev 10 mln. teńge bólip, jomarttyq tanytty. Túrkistan oblysynyń perzenti, búginde Nur-Sultan qalasynda turatyn belgili metsenat, fılantrop Oralbek Botbaı óńirdegi qorǵa 1 mln. teńge aýdardy. El Prezıdenti Qasym-Jomart Toqaevtyń qaýipti dertti jeńýde qoǵamdy uıystyrý jónindegi bastamasyn nazarda ustaǵan azamattarǵa el rıza.

«Nur Otan» partııasynyń músheleri, oblystyq máslıhat depýtattary Maǵaýııa Turysbekov («Jańa arna qurylys» JShS) pen Jańabaı Aǵabekov («Evro remont servıs») 1 mln. teńgeden kómektesse, depýtat Almas Salımov te («Alja-qurylys» JShS) 1 mln. teńgeni el úshin bóle bildi. Jeke kásipker Talǵat Qarjaýov 1,2 mln. teńgege demeýshilik tanytsa, el janashyry, «Ordabasy qus» JShS-niń dırektory Murat Taǵaev 2 mln. teńge kólemindegi et ónimderimen kómek usynbaq.

Sondaı-aq aýdan, qalalarda kásipkerler men jekelegen azamattar da turǵyndarǵa qaıyrymdylyq jasap jatyr.