Túrkistan oblysynyń emdeý mekemeleri koronavırýsqa qarsy daıyndyǵyn pysyqtaýda
TÚRKІSTAN. QazAqaparat - Túrkistan oblysyndaǵy barlyq aýrýhanalarda koronavırýstyń taralýyna jol bermeý sharalary kúsheıtildi. Emdeý mekemeleri jappaı karantınge kóshken, dep habarlaıdy QazAqparat óńirlik kommýnıkatsııalar qyzmetine silteme jasap.
Túrkistan oblysynyń óńirlik kommýnıkatsııalar qyzmetinde ótken brıfıngte Túrkistan qalalyq ortalyq aýrýhanasynyń bas dárigeri Janbolat Dildábekov pen Kentaý qalalyq ortalyq aýrýhanasynyń bas dárigeri Gúlbaný Syzdyqova álemdi dúrliktirgen pandemııaǵa qatysty saqtyq sharalary týraly málimdedi.
Asa qaýipti ınfektsııalyq indetke qarsy kúres maqsatynda aýrýhanalardyń aýmaǵyna jedel-járdem kólikterinen basqa jeke avtokólikterdiń kirýine tyıym salynyp, qatań qadaǵalaýǵa alynǵan. Tótenshe jaǵdaıdyń engizilýine baılanysty naýqastarǵa kelýshilerdiń aýrýhana ishine kirýine ruqsat joq. Al, emhanalar óz jumys kestesine sáıkes qyzmet kórsetýde.
«Kentaý qalalyq aýrýhanasynda naýqastardy oqshaýlaýǵa arnalǵan 50 tósek-oryn bar. Medıtsına qyzmetkerleriniń barlyǵy derlik arnaıy dáris alǵan. Búginde aýrýhanada 75 dáriger, 240 orta býyn jáne 150 kishi býyn medıtsınalyq qyzmetkerleri jumys isteýde. Qajettilik týyndasa rezervtegi dárigerler jumyldyrylady», - dedi Kentaý qalalyq aýrýhanasynyń bas dárigeri Gúlbaný Jumaǵalıqyzy.
Al, Janbolat Berdibaıulynyń aıtýynsha, COVID-19 ınfektsııasymen kúreske Túrkistan qalalyq aýrýhanasynda 60 dáriger jáne 150 orta býyn medıtsınalyq qyzmetkerleri daıyn. Infektsııalyq statsıonarda 50 tósek oryn jasaqtalǵan. Aýrýhana vırýsqa qarsy, dene qyzýyn túsiretin, qarqyndy terapııa úshin qajetti preparattar qorymen jáne qorǵanys kıimderi, dezınfektsııalyq zattarmen qamtamasyz etilgen.
