Túrkistan oblysynyń dıqandary qyryqqabatty Reseıge eksporttap jatyr

TÚRKІSTAN. QazAqparat- Túrkistan oblysynyń dıqandary qyryqqabattyń eksportyn bastady, dep habarlaıdy QazAqparat tilshisi.

Jetisaı aýdanynda bıyl 1162 gektar aýmaqqa erte pisetin qyryqqabat egilgen bolatyn. Ónimniń basym bóligin «Zarısma», «Valıkor», «Magnýs», «Kevın Farao», «Rında», «Zakaz» sorttary qurap otyr. Qazirgi kezde erte pisetin qyryqqabattar Reseı, Belorýssııa jáne Eýropa elderine eksporttala bastady.

Máselen, óńirdegi «Daýylbaı ata» sharýa qojalyǵy alǵashqy qyryqqabat ónimderin kórshiles Reseı eline jiberip jatyr.

«48-50 kúnde pisetin Pekınka qyryqqabaty alǵashqy ónimin bere bastady. 1,5 gektarǵa egilgen 60 myń túp kóshetten shyqqan qyryqqabat 60 tonnany qurap otyr. Bul ketken shyǵyndarymyz men tókken terimizdiń tolyqtaı aqtalǵanyn bildiredi. Artylǵan qyryqqabat Reseı memleketiniń astanasy Máskeý qalasyna jóneltip jatyrmyz», deıdi «Daýylbaı ata» sharýa qojalyǵynyń tóraǵasy Momynjan Radjapov.

Foto Jetisaı aýdany ákimdigi