Túrkistan oblysynyń dıhandary kóktemgi ónimin ózge óńirlerge jónelte bastady
TÚRKІSTAN. QazAqparat – Túrkistan oblysynyń dıhandary erte kóktemgi ónimderin ózge óńirlerge jóneltip, tipti Reseıge eksporttaýǵa kiristi, dep habarlaıdy QazAqparat oblys ákiminiń baspasóz qyzmetine silteme jasap.
Jetisaılyq dıqandar qyryqabat óniminiń alǵashqy 50 tonnasyn Reseıdiń Voronej, Sankt-Peterbýrg, Ýfa qalalaryna jóneltti. Budan bólek Jylysý aýylynyń dıqandary da qyryqqabattaryn elimizdiń Almaty jáne Nur - Sultan qalalaryna tasymaldaýǵa kiristi. Aýdanda 11 361 gektar aýmaqqa baqsha daqyly egilse, 1500 myń alqapqa kókónis egilgen.
Bıyl Túrkistan oblysynda 825 myń gektar jerge aýyl sharýashylyǵy daqyldaryn egý josparlanyp otyr. Egis alqaby ónimniń barlyq túrin qamtıdy. Onyń ishinde kartop, kókónis, baqsha daqylynyń egis kólemi ótken jylmen salystyrǵanda 3,2 myń ga, mal azyqtyq daqyldar 11,6 myń ga jerge artyp otyr. Túrkistan oblysy aýyl sharýashylyǵy basqarmasynyń málimetinshe, kóktemgi dala jumystarynyń barysy qarqyndy.
Qazirgi sátke 159 myń gektar egistik alqapqa jazdyq daqyl túri egilgen. Óńirde barlyq jer jyrtý jumystary tolyǵymen aıaqtaldy. Kóktemgi dala jumystaryn júrgizýge aldyn ala arzan baǵamen janarmaı bólingen. Mıneraldy tyńaıtqysh ta jetkilikti.
Aıta keterligi, «Bir alqaptan jylyna 2-3 ónim alý» jobasy bıyl da barynsha júzege asyrylady. Tájirıbe kórsetkendeı, bul jobanyń arqasynda 2 - 2,5 esege artyq ónim alýǵa bolady. Qazirdiń ózinde 1273 sharýa qojalyq birinshi erte pisetin kókónis daqyldarynyń ónimin jınaýǵa kirisken.
Sonymen qatar, dıqandar jylyjaılarǵa qııar, qyzanaq daqylyn egip, jemisin kórýde. Al, erte pisetin qyryqqabattan sáýir-mamyr aılarynda 300 myń tonnaǵa jýyq ónim jınaý josparlanyp otyr. Aýyl sharýashylyǵy mınıstrligi tarapynan qyryqqabat óniminiń eksportyna qoıylǵan shekteý alynyp tastaldy. Sonyń arqasynda elimizdiń ózge óńirlerine 50 myń tonna jáne Reseı Federatsııasyna 250 myń tonna ónim satý josparlanyp otyr. Máselen, búginde Mańǵystaý, Batys Qazaqstan, Qostanaı, Qyzylorda, Qaraǵandy oblystaryna ońtústikten qyryqqabat, qyzanaq, qııar ónimderi jóneltildi.
Sondaı-aq, qabyldanǵan karantındik sharalarǵa baılanysty tez buzylatyn ónimdi post beketterden kedergisiz tasymaldaý maqsatynda «#BizBirgemiz Túrkistan oblysy azyq-túlik ónimderi» atty logotıp uıymdastyrylyp, árbir júk kólikterine fıtosanıtarlyq jáne karantındik sertıfıkattarmen qamtamasyz etý qarastyrylǵan. Bul arnaıy logotıpi bar kólikterdiń post beketterde kedergisiz ótýine múmkindik beredi.
