Túrkistan oblysynyń dárigerleri júrek aqaýymen týǵan sábıdi aman alyp qaldy
TÚRKІSTAN. QazAqparat – Túrkistan oblysynyń dárigerleri júrek aqaýymen týǵan sábıdi aman alyp qaldy. Bes saǵatqa sozylǵan kúrdeli otadan keıin sábıdiń keýde qýysy jabylyp, kardıohırýrgııa bólimine aýystyrylǵan, dep habarlaıdy QazAqparat tilshisi.
Oblystyq Qoǵamdyq densaýlyq saqtaý basqarmasynyń málimetinshe, naýqas náreste dúnıege kelgennen tórt kúnnen keıin jaǵdaıy nasharlaǵan. Júreginiń qolqa doǵasynyń aqaýymen dúnıege kelgen Sofııany dárigerler shuǵyl túrde sanıtarlyq avıatsııamen Shymkent qalalyq perzenthanasynan Túrkistan oblystyq balalar aýrýhanasyna jetkizgen. Der kezinde jasalǵan otanyń arqasynda sábıdiń densaýlyǵy jaqsaryp, hırýrgııa bólimshesine aýystyrylǵan. Mamandar júrektiń qolqa doǵasynyń aqaýyna ota jasalmaǵan jaǵdaıda, bala qan aınalymy júrmeı eki aptaǵa jeter-jetpes baqılyq bolatynyn aıtady.
Aıta keteıik, Túrkistan oblystyq balalar aýrýhanasynyń kardıohırýrgııa bólimshesinde jyl saıyn sábılerdiń ashyq júreginde 250 ota jasalynady. Olardyń 40 paıyzy júrek aqaýy bar jańa týǵan náresteler. Túrkistan oblystyq balalar aýrýhanasynda dárigerlerdiń biliktiligin arttyrý maqsatynda túrli oqytý sharalary uıymdastyrylyp otyrady. Bas dárigeri Gaýhar Úkibaevanyń aıtýynsha, aýrýhanada kúni keshe trıaj júıesi engizilip, shuǵyl medıtsınalyq kómek taqyrybynda qyzmetkerlerine arnaıy dáris ótkizilgen. Balalarǵa medıtsınalyq qyzmet kórsetýdiń sapasy men qol jetimdiligin jaqsartý maqsatynda qabyldaý bólmesin talapqa saı qaıta jańǵyrtý qarastyrylyp otyr.
