Túrkistan oblysynyń dárigerleri koronavırýstyń keri áserimen kúresti úırendi
TÚRKІSTAN. QazAqparat - Dárigerler Covid-19 saldarymen kúres pen nevrologııalyq asqynýlardy emdeý boıynsha tájirıbe almasty, dep habarlaıdy QazAqparat Túrkistan oblysy ákiminiń baspasóz qyzmetine ilteme jasap.
Koronavırýsqa shaldyqqan adamdy sebepsiz úreı men qorqynysh bıleýi múmkin. Sonymen qatar, ıis pen dám sezbeý qaýpi bar. Insýlt bolýy múmkin.
Bul týraly «Mı aýrýlaryn emdeý» atty eki kúndik ǵylymı-praktıkalyq konferentsııa barysynda belgili boldy. Dárigerler basqosýyn Túrkistan oblysy qoǵamdyq densaýlyq basqarmasynyń qoldaýymen Ońtústik-Qazaqstan medıtsınalyq akademııasy uıymdastyrdy.
Onlaın formatta ótken halyqaralyq is-sharaǵa Qazaqstan, Reseı, AQSh pen Ulybrıtanııa jáne Ýkraına elderiniń 2000-ǵa jýyq bilikti dárigerleri qatysty.
Reseılik mamandar koronavırýstyq ınfektsııany juqtyrǵan naýqastarda dám, ıis sezbeý, ınsýlt aýrýlary nevrologııalyq asqynýlar retinde paıda bolatynyn aıtty. Kovıdten keıingi klınıkalyq belgilerdiń taǵy biri júıke júıesiniń buzylýy bolýy múmkin - negizsiz úreı men qorqynysh. Konferentsııa nátıjesinde I, II, III dárejeli jeńimpazdar anyqtaldy. Olar arnaıy dıplomdarmen marapattaldy.
