Túrkistan oblysynyń dárigerleri qaıyrymdylyq sharasyn ótkizdi

TÚRKІSTAN. QazAqparat - Túrkistan oblysy Báıdibek aýdanynyń dárigerleri qaıyrymdylyq sharasyn ótkizdi. Aýdandyq ortalyq aýrýhana ujymy kópbalaly jáne áleýmettik jaǵynan az qamtamasyz etilgen otbasylarǵa qoldaý kórsetti, dep habarlaıdy QazAqparat tilshisi.

Aýrýhananyń bas dárigeri Gúldarııa Shardarbekovanyń bastamasymen aq halatty abzal jandar bir kúndik jalaqysyn qaıyrymdylyq sharalaryna aýdardy. Saýapty iske bir kisideı atsalysqan aýdan dárigerleri muqtaj jandarǵa qol ushyn berýge árdaıym daıyn ekenin osylaısha taǵy bir dáleldedi. Aýdandyq aýrýhana men oǵan qarasty 12 dárigerlik ambýlatorııadan jaǵdaıy tómen 72 otbasy anyqtalǵan bolatyn. Olar úshin arnaıy 6 iri qara mal soıylyp, 144 qap un, 72 qap vermıshel, kúrish jáne maı alyndy. Alynǵan azyq-túlikter ár otbasyǵa teńdeı bólinip, taratyp berildi. Osylaısha ár shańyraqqa 17 keliden et, eki qap un, 5 lıtr ósimdik maıy, 5 keli vermıshel men kúrish jetkizildi.

Aýdandaǵy medıtsına qyzmetkerleri bul kúni sondaı-aq qan tapsyrdy. 93 dáriger men medbıke jyl saıynǵy úrdis boıynsha qan ortalyǵyna baryp, saýapty is jasady. Onyń 27-si turaqty donor retinde tirkelip, naýqastardyń ómirin saqtap qalýǵa óz úlesterin udaıy qosyp júr.

«Qan bankin jasap qoıǵanymyz túrli keleńsizdikterdiń aldyn alady. Qan tapsyrǵan qaıyrymdylyq qana emes, deni saý adam úshin paıdaly da. Bizdiń uıymnyń arasynda únemi qan tapsyryp turatyn turaqty donorlar jeterlik», - deıdi Báıdibek aýdanynyń ortalyq aýrýhanasy bas dárigeriniń orynbasary Beksultan Rysbekov.