Túrkistan oblysynyń dárigerleri densaýlyq saqtaýdyń álemdik ádisterin meńgerýde
TÚRKІSTAN. QazAqparat - Túrkistan oblysynyń dárigerleri densaýlyq saqtaý salasyn basqarýdyń álemdik ádisterin meńgere bastady. Oblystyq Densaýlyq saqtaý basqarmasynyń basshysy Muqan Egizbaevtyń bastamasymen óńirdiń aq halattylary densaýlyq saqtaý menedjmenti men álemdik standarttarǵa saı tıimdi, utymdy basqarýdyń ádisterin úırenýge kóshti, dep habarlaıdy QazAqparat tilshisi.
Medıtsına salasynda osynaý jańashyldyqty Shardara men Maqtaral ortalyq aýrýhanalarynyń dárigerleri meńgere bastady. Emdeý mekemeleriniń 40- qa jýyq qyzmetkeri ID Group kompanııasynyń negizin qalaýshy jáne dırektory Gúlnar Shákirovadan densaýlyq saqtaý menedjmenti men álemdik standarttarǵa saı tıimdi ári utymdy basqarýdyń ádisterin endirýdiń qyr - syryn úırendi. Atalǵan semınar zamanaýı talaptarǵa saı sapaly da qaýipsiz medıtsınalyq kómek kórsetý men aýrýhanalardyń básekege qabilettigin arttyrý maqsatynda uıymdastyryldy. Sondaı-aq bul shara medıtsınalyq mekemelerdiń bedelin qalyptastyrý, árbir naýqas úshin jaǵdaı jasaý jáne halyq densaýlyǵyn jaqsartýǵa baǵyttaldy.
Semınar kezinde aq halattylar «Biz úshin júrektiń árbir soǵysy mańyzdy», «Baqytqa jeter jolda birgemiz» uranymen barlyq jańa bastamalardy meńgerdi. Aldaǵy ýaqytta bul jobany Shardara aýdandyq aýrýhanasyna tájirıbe retinde engizilip, ári qaraı Túrkistan oblysyndaǵy barlyq medıtsınalyq mekemelerde ótkizý kózdelip otyr.
