Túrkistan oblysynyń Call-ortalyǵyna eki aptada 37 myń adam habarlasty
TÚRKІSTAN. QazAqparat - Túrkistan oblysy ákimdiginiń janynan qurylǵan Call-ortalyqqa óńir turǵyndarynan 37 myńnan astam qońyraý kelip tústi, dep habarlaıdy QazAqparat.
Óńirlik kommýnıkatsııalar qyzmetinen málim etkendeı, «109» nomerine habarlasqan azamattardyń deni tótenshe jaǵdaı kezinde aýdan qalalardaǵy turǵyndardyń júrip-turýy, azyq-túlik baǵalary, halyqqa qyzmet kórsetý ortalyqtary men memlekettik mekemelerdiń jumys kestesi, kópbalaly, áleýmettik az qamtylǵan otbasylarǵa jáne múgedekterge Úkimetten beriletin áleýmettik kómek jaıyndaǵy saýaldarmen habarlasqan.
El boıynsha jarııalanǵan tótenshe jaǵdaıǵa baılanysty 23 naýryzdan bastap turǵyndardyń saýaldaryna jedel jaýap berý maqsatynda oblys ákimdiginiń janynan Call–ortalyq quryldy.
Búginde ortalyq táýlik boıy 24/7 formatynda turǵyndardan qońyraýlar qabyldap jatyr. Jınalǵan barlyq saýaldardy operatorlar salalyq qurylymdarǵa joldap, der kezinde keri baılanys ornatyp, jumys istep keledi.
