Túrkistan oblysynyń blokbeketterinde 44 myńǵa jýyq jolaýshy tekserildi
TÚRKІSTAN. QazAqparat – Túrkistan oblysynyń blokbeketterinde 17 myńnan astam kólik pen 44 myńǵa jýyq jolaýshy tekserildi, dep habarlaıdy QazAqparat.
18 naýryzdan bastap Almaty jáne Qyzylorda baǵytyndaǵy shekaralyq aımaqtarda ornalasqan «Saýran» jáne «Shaqpaq» beketterinde koronovırýs dertine baılanysty táýlik boıǵy blokbeketter qoıyldy.
Oblystyq Polıtsııa departamentiniń málimetine sáıkes, jalpy Túrkistan oblysy boıynsha 30 blokbeket ornatylǵan. «Bul beketterde polıtseıler jáne medıtsına mamandary árbir kólikti toqtatyp, arnaıy qurylǵymen azamattardyń dene qyzýyn ólshep, tekseristen ótkizýde. Odan bólek áleýmettik, kásipkerlik nysandar men adam kóp jınalatyn qoǵamdyq oryndardyń jumys jasaý rejımi ózgertilip, shekteýler qoıyldy», - dedi vedomstvodan.
Atap ótilgendeı, respýblıkalyq mańyzy bar joldarda ornalasqan «Saýran», «Shaqpaq» blokbeketterinde 26 naýryzdaǵy esep boıynsha, 17 myńnan astam kólik pen 44 myńǵa jýyq jolaýshy tekserildi. Atalǵan aımaqtarda polıtseıler saǵat saıyn baqylaý jasap, kezekshilikpen qyzmet atqarýda. «Osy rette, tótenshe jaǵdaıǵa baılanysty oblystyń árbir turǵynyna adamdar kóp shoǵyrlanatyn toı-jıyndar, kishigirim otyrystar men is-sharalardy toqtata turyp, úıden shyqpaýǵa jáne múmkindiginshe barlyq qaýipsizdik talaptaryn saqtaýǵa shaqyramyz», - dedi PD-dan.
