Túrkistan oblysynyń bilim salasynda jemqorlyq deńgeıi tómendedi
Ákimdiktiń baspasóz qyzmeti habarlaýynsha, májiliste QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Ǵ.Tursynbaev sońǵy úsh jylda respýblıka boıynsha bilim salasyndaǵy jemqorlyq aıasynda 513 qylmystyq is qozǵalyp, 305 tulǵa qylmystyq jaýapkershilikke tartylǵanyn málimdegen. Bul respýblıkalyq kórsetkish bolyp tabylady.
Al, Túrkistan oblysynda sońǵy úsh jylda bilim salasynda sybaılas jemqorlyqqa qatysty 50 jaǵdaı tirkelgen. Búginde birqatar tulǵalar qylmystyq jaýapkershilikke tartylǵan.
Oblystyq bilim basqarmasynyń basshysy Isataı Saǵyndyqovtyń aıtýynsha, 2018 jyldyń 8 aıynda oblys aýmaǵynda bilim berý uıymdarynyń laýazymdy tulǵalarymen jasalǵan 6 sybaılas qylmystyq is tirkelgen. Onyń 4-ýi mektep dırektor men 1 tehnıkalyq qyzmet kórsetýshi jáne 1 jetekshi mamanǵa qatysty. Bul ótken jyldaǵy tıisti merzimmen salystyrǵanda óńirdegi ahýaldyń jaqsaryp, bes faktige azaıǵanyn kórsetedi. Óıtkeni 2017 jyldyń 8 aıynda sybaılas jemqorlyqqa qatysty 11 jaǵdaı tirkelgen bolatyn.
Búginde basqarma tarapynan sybaılastyqtyń aldyn alýǵa baǵyttalǵan oblystyq deńgeıde tıisti jumystar atqarylýda. Mektepke deıingi bilim berý uıymdaryna joldama berý jáne kezekke qoıý protsesteri avtomatty túrde júrgizilip, búgingi kúnge 481 mekeme nemese barlyq 1368 mektepke deıingi mekemelerdiń 35 paıyzy osy júıemen jumys júrgizýde. Jyl sońyna deıin balabaqsha.sitcen.kz portalyna balabaqshalardyń 100 paıyzyn qosý josparlanýda. Júıe qyzmetimen búginde 12 myńnan astam búldirshin balabaqshaǵa ornalasqan. Sondaı-aq oblystyń 902 (100%) mektebinde jumys.sitcen.kz júıesi engizilgen. Búginge deıin atalǵan júıe qyzmeti arqyly 933 bos jumys oryn jarııalanyp, 321 adam jumysqa ornalasqan.