Túrkistan oblysynyń bilim oshaqtarynda Ákeler mektebi ashyldy
TÚRKІSTAN. QazAqparat - Túrkistan oblysy ákimdiginiń tapsyrmasymen barlyq aýdan, qalalardaǵy orta mektepterde «Ákeler mektebi» quryldy, dep habarlaıdy QazAqparat oblys ákiminiń baspasóz qyzmetine silteme jasap.
Onyń quramyna kirgen aqsaqaldar men túrli uıym músheleri jasóspirimder tárbıesin túzeý men salt-dástúr, ulttyq qundylyqtardy dáripteýmen aınalysyp, otbasylyq tárbıeni nasıhattap, mektepterdegi bala tárbıesine atsalysady.
Túrkistan oblysynyń Adamı áleýetti damytý basqarmasynyń bastamasymen oblystyń ár aýdanda atalǵan áleýmettik joba aıasynda túrli is-sharalar ótkizilýde. Ordabasy aýdany, Sh.Ýalıhanov atyndaǵy mektep-gımnazııasynda «Ákeler mektebiniń» uıymdastyrýymen «Ákeler mektebi – tárbıe mektebi» taqyrybynda oblystyq semınar ótti. Jıynda úzdik 5-synyp oqýshylaryn «Jas ulan» uıymyna qabyldaý rásimi ótti. Jıynǵa qatysqan Túrkistan oblysy ardagerler keńesiniń músheleri men oblystyq «Ákeler mektebiniń» tóraǵalary, zııaly qaýym ókilderi jáne mektep basshylary oqýshylarǵa aq batasyn berdi.
«Áke – bala úshin taý tulǵa. Bala ákege qarap ósedi. Ár áke balasyna ýaqyt bólip, keńesip otyrǵany durys. Sonda balanyń oı órisi durys qalyptasyp, kóńil kókjıegi keńeıip, kez-kelgen máselege jan-jaqty qaraýǵa umtylady. Ózi túzý aǵashtyń kóleńkesi esh ýaqytta qısyq bolmaıdy. Durys áke durys tárbıe berse, qoǵamnyń durys damýyna aıtarlyqtaı úles qosary anyq», – dedi Túrkistan oblysy ardagerler keńesiniń tóraǵasy Jeńisbek Máýlenqulov jıyn barysynda.
Semınarda «Áke – altyn dińgegim», «Áke – tirek, bala – júrek», «Otbasyndaǵy áke orny», «Otbasyndaǵy ákeniń bedelin qalaı arttyrýǵa bolady», «Áke júregi taýdan úlken, ana júregi teńizden tereń» taqyryptarynda ata-analar men oqýshylardyń qatysýymen tárbıelik is-sharalar ótti.
