Túrkistan oblysynyń Báıdibek aýdanynda jańa sport nysandary ashyldy
TÚRKІSTAN. QazAqparat - Búgin Túrkistan oblysynyń Báıdibek aýdanynda óńir basshysy Janseıit Túımebaevtyń qatysýymen birqatar sport nysany paıdalanýǵa berildi. Atap aıtqanda, aýdanda buǵan deıin bolmaǵan jabyq tennıs korty men jabyq júzý basseıni ashyldy. Oblys ákimi sportqa den qoıǵan aýdannyń bir top jastarymen arnaıy kezdesip, pikir almasty, dep habarlaıdy QazAqparat.
«Buryn mundaı nysandar kóbinese qalalyq jerlerde boı kóterip, shaharda ómir súretin jastar úshin ǵana qoljetimdi bolatyn. Endi, mine, aýyldyq jerlerde de tek sporttyń kúres, boks túrlerine ǵana emes, ózge de sırek shuǵyldanatyn sport túrlerine memleket tarapynan basymdyq berilip keledi. Bul, Elbasymyzdyń taıaýda jarııalaǵan Joldaýynda aıtylǵandaı sportqa tereńirek mán berip, halyqtyń salaýatty ómir saltymen aınalysýy kerektigi týraly aıtqan tapsyrmasynyń bizdiń óńirde oryndalyp jatqanynyń aıǵaǵy dep bilem», - dedi aımaq basshysy.
Aıta ketý kerek, aýdan men aýyldyq jerlerde zamanaýı sport nysandarynyń kóptep ashylýy tegin emes. Báıdibekten buǵan deıin Marat Myqtybekov (Azııadaǵy dzıýdo federatsııasynyń prezıdenti), Erkebulan Shynálıev (2008 jyly Beıjińde ótken Olımpıadanyń bokstan qola medal ıegeri), Qasymhan Tólenbaı (Qazaq kúresinen Álem chempıony) syndy sporttaǵy oǵlandar shyqqany belgili. Budan keıin de aýdanda búgingi paıdalanýǵa berilgen sport nysandarynyń arqasynda atalǵan saıypqyrandardyń jolyn jalǵaıtyn, aýdannyń mereıin odan ári ústem etetin jastar shyǵatynyna senim zor.
Jalpy quny 1,3 mlrd teńge bolatyn Shaıan aýylynda ashylǵan nysandardyń demeýshisi sheteldik ınvestorlar. Atap aıtqanda, qurylysy byltyr bastalǵan sporttyq obektilerdiń tapsyrys berýshi mekemesi «International fund for Houbara Conservation» korporatıvtik qory. Jabyq tennıs kortynda barlyq jaǵdaılar jasalsa, basseınde bir aýysymda 32 adam júzý sportymen mashyqtana alady.
Osydan soń, bul kúni sporttyń voleıbol, basketbol, fýtbol, tennıs túrleri men sport zaldaryna arnalǵan ashyq alańshalar paıdalanýǵa berildi.
Jalpy búgingi tańda Báıdibek aýdanynda balalar men jasóspirimder sport mektebi jumys isteıdi. Onda sporttyń 10 túrinen voleıbol, basketbol, fýtbol, ústel tennısi, toǵyzqumalaq, boks, qazaq kúresi, dzıýdo, grek-rım, erkin kúres bólimderi bolashaq chempıondardy jattyqtyrýda. Sport mektebinde qazirgi tańda 84 bapker 157 topta 1810 oqýshymen jattyǵý jumystaryn júrgizedi. Jyl basynan beri aýdanda 97 sporttyq is-shara uıymdastyrylyp, 9 myńǵa jýyq aýdan turǵyny qatysqan.
Oblystan barǵan jumysshy top aýdanǵa sapary aıasynda Báıdibek Qarashauly eskertkishine gúl qoıý rásimin ótkizdi.
Budan keıin, Báıdibek aýdanynan shyqqan elimizge belgili azamattardyń basyn qosqan «Shejireli Shaıan, Berekeli Báıdibek» forýmy ótti. Onda tarıhqa baı aýdannyń ótkeni men keleshegi týraly baıandamalar oqylyp, Báıdibektiń áleýmettik-ekonomıkalyq damýyna úles qosqan birqatar azamattar marapattaldy.
