Túrkistan oblysynyń bas sanıtary men basqarma basshysy birinshi bolyp vaktsına saldyrmaq
TÚRKІSTAN. QazAqparat - Túrkistan oblysynda koronavırýsqa qarsy ekpeni eń aldymen óńirdiń bas sanıtar dárigeri men qoǵamdyq densaýlyq basqarmasynyń basshysy saldyratyn boldy, dep habarlaıdy QazAqparat tilshisi.
Sala basshylary mundaı qadamǵa el ishinde vaktsınaǵa degen senimdilikti arttyrý úshin baryp jatqandaryn aıtty.
Oblystyń bas dárigeri Marat Pashımovtyń aıtýynsha, aımaqta koronavırýs ınfektsııasyn juqtyrǵan naýqastardyń sany kún sanap artyp keledi. Jyl basynan beri óńirde 335 adamnan qaýipti indet belgileri anyqtalǵan. Ásirese Sozaq pen Saıram jáne Maqtaaral aýdandarynda indetke shaldyǵý jıilep tur. Sondyqtan aımaqta ekpe salý sharalaryna daıyndyq sharalary osy bastan júrgizilip jatyr.
«Eń birinshi ekpeni qaýipti aımaqta júrgen medıtsına qyzmetkerleri saldyrady. Olar ınfektsııalyq gosıtalda jumys isteıtin qyzmetkerler. Keıin jedel járdemmen júretin qyzmetkerlerge salýdy josparlap otyrmyz. Úshinshi, SES-tiń mamandary saldyrady dep josparlanýda. Tórtinshi, quqyq qorǵaý organdarynyń mamandary. Ary qaraı bizde «D» esebinde turǵan adamdar vaktsına alady» dedi Marat Pashımov.
Eske salsaq, buǵan deıin Qazaqstanda koronavırýsqa qarsy vaktsına 1 aqpannan bastap egiletindigi habarlandy.Sonymen qatar 18 jasqa tolmaǵan balalar men 65 jastan asqan adamdarǵa vaktsınanyń tıimdiligi men qaýipsizdigi týraly málimet joq, sondyqtan bul jastaǵylarǵa ekpe salynbaıdy. Al búgingi Úkimet otyrysynda Prezıdent Qasym-Jomart Toqaev ákimderge vaktsınatsııa máselesinde dúrbeleńge jol bermeýdi tapsyrdy.
