Túrkistan oblysynyń bas polıtseıi halyqty qylmyspen birlesip kúresýge shaqyrdy
TÚRKІSTAN. QazAqparat – Túrkistan oblysynda Polıtsııa departamentiniń bastyǵy, polıtsııa general-maıory Qaırat Dálbekov halyq aldynda esep berdi. Kezdesýde 8 aıda atqarylǵan jumystar qorytyndylanyp, turǵyndardyń saýaldaryna jaýap berildi, dep habarlaıdy QazAqparat tilshisi.
Esep berý jıynynda departament bastyǵy óńirde asa aýyr qylmystar 32,9 paıyzǵa, jeńil jáne aýyrlyǵy ortasha qylmystar 26,7 paıyzǵa kemigenin aıtty. Sondaı-aq, qaraqshylyq qylmysy 40 paıyzǵa, urlyq 31,6 paıyzǵa tómendegenin jetkizdi. Oǵan qosa, jol qozǵalysy da únemi baqylaýda ekendigin, bul baǵytta «Avtobýs», «Quqyqtyq tártip», «Jol qaýipsizdigi», «Abaılańyz balalar!», «Nazar aýdaryńyz, balalar!» sekildi jedel profılaktıkalyq is-sharalar qarqyndy iske asyrylýda dep atap ótti. Nátıjesinde, oblysta jol-kólik oqıǵalary 16,5 paıyzǵa tómendegenmen, jol apaty saldarynan qaza bolǵandar sany 20 paıyzǵa artqan.
«Oblysymyzda mal urlyǵy boıynsha 19 qylmystyq top quryqtaldy. 700-ge jýyq mal qylmyskerlerden aıǵaqty zat retinde alynyp, zańdy ıelerine qaıtaryldy», - dedi Qaırat Dálbekov.
Jıynǵa qatysqan turǵyndar tártip saqshylarynyń jumysynyń qıyndyǵyn aıtyp, qyzmetkerler sanyn kóbeıtýdi surady. Oranǵaı aýylynan kelgen aqsaqal eldimekender arasyndaǵy úlken jolda kólikter óte qatty jyldamdyqpen júretinin, osy jerlerge jol belgileri men tártip saqshylaryn kóptep qoıýdy surady. Al, Maqtaral aýdanynan kelgen qarııa jol-qozǵalysy erejesin buzǵan jandarǵa jazany qatańdatý kerek degen pikirin bildirdi. Óz kezeginde polıtsııa general-maıory osyndaı kóptegen máselelerge tushymdy jaýaptar berdi. Turǵyndardyń usynystary men pikirlerin tyńdap, aldaǵy ýaqytta eskeretinin jetkizdi.
«Meniń basty baǵytymnyń biri – halyqqa qorǵan bolatyn qyzmetkerlerdi tárbıeleý. Sondyqtan da ashyq bolýǵa umtylǵan polıtsııa qyzmetkerlerimen birge oblysymyzdyń qaýipsizdigi úshin kúsh biriktirýge, bir-birimizdi múmkindiginshe qoldaýǵa shaqyramyn. Árkim óz mal-múlkine múmkindiginshe saq bolyp, qaraýsyz qaldyrmasa, urlyq oryn alǵan jaǵdaıda ýaqytyly polıtseılerdi habardar etse degen usynysym bar. Kez-kelgen azamat úshin esigimniń ashyq ekenin, tipti áleýmettik jelide de turǵyndarmen «Keri baılanys, ashyqtyq» ornatý úshin jeke paraqsha ashtym. Jaǵdaıdyń barlyǵyn óz baqylaýymda ustaýǵa tyrysamyn», - dedi Qaırat Dálbekov.
