Túrkistan oblysynyń bas polıtseıi 150-den astam azamatty qabyldady

TÚRKІSTAN. QazAqparat – Túrkistan oblysynda «Azamattardy qabyldaýdyń biryńǵaı kúni» uıymdastyryldy. Atalǵan shara aıasynda oblystyq Polıtsııa departamentiniń bastyǵy, polıtsııa general-maıory Qaırat Dálbekov qabyldaýǵa aldyn ala jazylǵan turǵyndarmen «ZOOM» ınternet platformasy arqyly tildesti, dep habarlaıdy QazAqparat tilshisi.

Turǵyndardyń máselesin sheshý maqsatynda josparlanǵan sharaǵa departament bastyǵynan bólek orynbasarlary men polıtsııa basqarma, bólimderiniń basshylary qatysty. Qabyldaýǵa jazylǵan azamattardyń bir bóligi tikeleı efır arqyly ózderiniń aryz-shaǵymdaryn jetkizse, endi birqatary tergeýshilerdiń tııanaqty jumysyna alǵystaryn bildirdi. Arasynda ishki ister organyna qyzmetke ornalasý boıynsha óz saýalyn joldaǵandar da boldy. Departament bastyǵy azamattardyń máselesine mán berip, tıisti sala basshylaryna tapsyrmalar júktedi. ıAǵnı, aldaǵy ýaqytta turǵyndar tarapynan túsken árbir saýal boıynsha júıeli jumystar júrgiziletin boldy.

«Polıtsııa halyqqa qoljetimdi bolýy tıis. Ásirese jurtqa jaqyn bolýda ýchaskelik polıtseılerge artylar júk az emes. Olar árdaıym óz aýmaǵyndaǵy azamattardyń aryz-shaǵymyna den qoıyp, qylmystardyń aldyn alý jumystaryn júrgizip otyrýy kerek»,-dedi Qaırat Dálbekov.

Aıta keteıik, jyl basynan beri óńirdiń bas polıtseıi 158 adamdy qabyldaǵan bolatyn. Onyń ishinde 69 turǵynǵa onlaın-rejımde jaýap berdi. Olardan túsken suraqtardyń basym bóligi óz merziminde sheshimin tapqan.