Túrkistan oblysynyń azyq-túlik ónimderi blokposttan kedergisiz ótedi

TÚRKІSTAN. QazAqparat - Túrkistan oblysynyń azyq-túlik ónimderi blokposttan kedergisiz ótedi, dep habarlaıdy QazAqparat óńirlik kommýnıkatsııalar ortalyǵyna silteme jasap.

Túrkistan oblysynda egistikti ártaraptandyrý jumystaryna sáıkes ótken jylmen salystyrǵanda kartop, kókónis, baqsha daqyldarynyń egis kólemi 3,2 myń gektarǵa artyp 122 myń gektarǵa, mal azyqtyq daqyldar 11,6 myń gektarǵa artyp 213 myń gektarǵa jetken. Al, kerisinshe masaqty daqyldar 4,8 myń gektarǵa qysqartylyp 226,9 myń gektarǵa, maqta daqyly 12,7 myń gektarǵa qysqartylyp, 118 myń gektarǵa egilgen. Bul týraly oblystyq aýylsharýashylyǵy basqarmasynyń basshysy N.Badyraqov óńirlik kommýnıkatsııalar qyzmetinde ótken brıfıngte málimdedi.

Onyń sózinshe, qazirgi tańda kóktemgi dala jumystary jospar boıynsha atqarylyp keledi.

«Jalpy bıyl oblysta egis kólemi 825,4 myń gektarǵa jetkizý mejelenip otyr. Búginde jer aıdaý jumystary 424 myń gektarǵa mejelenip, tolyǵymen oryndaldy. Sor shaıý jumystary 105 myń gektarǵa nemese 93,0%-ǵa atqaryldy. Kóktemgi dala jumystaryn júrgizýge 37 myń tonna janarmaı bólindi. Ár lıtri 160 teńgeden. Bul naryqtyq baǵadan 25 teńgege arzan. Kóktemgi dala jumystaryna arnalǵan tehnıkalardyń daıyndyǵy 97%-dy qurap otyr», – dedi basqarma basshysy.

Jalpy oblys boıynsha taýar óndirýshiler daqyldardyń tuqymymen tolyq qamtamasyz etilgen. Kóktemgi dala jumystaryn júrgizýge «Agrarlyq nesıe korporatsııasy» AQ tarapynan 5,3 mlrd teńge nesıe qarjy qaralǵan. Búginde 2,6 mlrd teńgege 654 joba maquldanyp, 1 mlrd teńgemen 112 taýar óndirýshi qarjylandyrylǵan.

Byltyr óńirde eńbek ónimdiligin arttyrý maqsatynda «Bir alqaptan jylyna 2-3 ónim alý» jobasy qolǵa alynyp, 3 mlrd teńgege 107 joba iske asqan. Nátıjesinde 9 mlrd teńgeniń aýylsharýashylyǵy ónimi óndirilgen.

Túrkistan oblysy ákimdigi tarapynan ónim ótkizý naryqtaryn aıqyndaý maqsatynda barlyq oblys ákimdikterimen memorandýmǵa qol qoıylyp, elimizdiń ózge óńirlerine 50 myń tonna jáne Reseı Federatsııasyna 250 myń tonna ónim satý josparlanyp otyr. Qazirdiń ózinde birqatar oblystarǵa 67 tonna qyryqqabat, 444 tonna qyzanaq, 453 tonna qııar jóneltildi.

Sonymen qatar, qabyldanǵan karantındik sharalarǵa baılanysty tez buzylatyn ónimdi post beketterden kedergisiz tasymaldaý maqsatynda « #BizBirgemiz Túrkistan oblysy azyq-túlik ónimderi» atty logotıp uıymdastyrylyp, árbir júk kólikterine fıtosanıtarlyq jáne karantındik sertıfıkattarmen birge qamtamasyz etilmek.

Óz kezeginde bul arnaıy logotıpi bar kólikterdiń blokposttan kedergisiz ótýine múmkindik týady.