Túrkistan oblysynyń aýrýhanalary jedel járdem kóligimen jáne jabdyqtarmen tolyqty

TÚRKІSTAN. QazAqparat – Túrkistan oblysyndaǵy medıtsınalyq mekemeler qajetti jabdyqtarmen jáne jedel járdem kóligimen tolyqty. Bul sharalardyń barlyǵy óńirdegi juqpaly aýrýlarmen, sonyń ishinde COVID-19 koronavırýs ınfektsııasymen kúreske paıdalanylmaq, dep habarlaıdy QazAqparat tilshisi.

Óńirge 5 ottegi kontsentratory, 50 pýlsoksımetr jetkizildi. Sondaı-aq, Shevrolet Damas markaly 8 jedel járdem kóligi keldi.

Buǵan deıin de aımaqtaǵy aýrýhanalarǵa pýlsoksımetrler jáne ottegi kontsentratorlary bar gýmanıtarlyq júk kelgen bolatyn. Bul kómek «Samuryq-Qazyna» AQ men QR Densaýlyq saqtaý mınıstrligi arasyndaǵy yntymaqtastyq týraly memorandým aıasynda kórsetilip otyr.

«Samuryq-Qazyna» AQ kompanııalar toby qaıyrymdylyǵynyń biryńǵaı operatory – «Samruk-Kazyna Trust» áleýmettik jobalardy damytý qory qajetti jabdyqtardy satyp alyp, olardy óńirlerge jibergen edi.

«Qazyǵurt aýdandyq ortalyq aýrýhanasyna «Samuryq-Qazyna» AQ-men jedel járdem kóligi men medıtsınalyq qural-jabdyqtar berildi. Bizdiń elimizdegi pandemııaǵa baılanysty qıyn kezeńderde kórsetilgen qoldaý úshin alǵys aıtqym keledi. Osyndaı qoldaý arqyly biz vırýspen kúresti odan ári jalǵastyramyz», - dedi Qazyǵurt aýdandyq ortalyq aýrýhanasynyń bas dárigeri Eldos Sultanov.

Aıta keteıik, mundaı jıyntyqtardy ár oblys, sondaı-aq respýblıkalyq mańyzy bar qalalar alyp otyr.

«Bul sharalardyń barlyǵy bizdiń medıtsınamyzdyń juqpaly aýrýlarmen, sonyń ishinde COVID-19 koronavırýstyq ınfektsııamen kúresýge daıyndyq deńgeıin arttyrýǵa jáne ulttyq densaýlyq saqtaý júıesin nyǵaıtýǵa baǵyttalǵan», - deıdi «Samruk-Kazyna Trust» qorynyń resmı ókili Mıras Іrgebaev.

Eske sala keteıik, atalǵan memorandým aıasynda elimizdiń densaýlyq saqtaý júıesin uıymdastyrýǵa 100 jedel járdem kóligi men 1 000 ottegi kontsentratory, 50 ÓJJ apparaty men 1 000 pýlsoksımetr jetkizilmek.