Túrkistan oblysynyń ardagerleri men zııalylary atynan Elbasyna jedelhat joldandy
«Sizdiń kóregendigińizdiń arqasynda Qazaqstan myqty memleketke aınalyp, Ortalyq Azııa óńiri men TMD-da aldyńǵy orynǵa shyqty. Búkil álemdi moıyndatty. Siz «Qazaqstan joly» - «Nurly jol» syndy ózindik ózgeshe joldy salyp, elimizdi damýdyń bıik belesterine shyǵardyńyz. Áleýmettik baǵdarly, ekonomıka, ınnovatsııa, Qazaqstan halqynyń birligi men yntymaǵy, tatýlyq pen turaqtylyq temirqazyq etip alyndy. «Baq ta, taq ta talasqanǵa buıyrmaıdy, halyqtyq iste jarysqanǵa buıyrady» degen qanatty sózińiz bar. Qazir el astanasy Nur-Sultan qalasy búkil álem qyzyǵa kóz tigetin álemdik ortalyqqa aınaldy. Elorda - Elbasymyzdyń eren erliginiń jemisi. Muny jer-júziniń eki júzge jýyq memleketiniń barshasy moıyndady. Elbasymyzdyń erlikteri kóp. Solardyń biri Túrkistan qalasyn túletýdiń qolǵa alynýy. Mine, Sizdiń tarıhı Jarlyǵyńyz qabyldanyp, jańa oblys qurylyp, túrkiler tóri Túrkistannyń ortalyqqa aınalǵanyna eki jyl toldy. Túrkistan da bir kezdegi elorda sekildi eki-úsh aı saıyn tanymastaı tańǵaldyrylýda.
Ardaqty Elbasy!
Biz Táýelsizdik degende qasıetti halqymyz ben Tuńǵysh Prezıdentimizdi erekshe maqtan etemiz. Memleket basshysy, Sizdiń izgilikti izbasaryńyz, búgingi Prezıdentimiz Qasym-Jomart Toqaev sabaqtastyqty, ádilettilikti, ilgerileýdi basty baǵdar etip, syndarly murat jolynda aıanbaı eńbek etýde. Álemdegi qalyptasyp otyrǵan qıyndyqtardy eńserýdiń erekshe joldaryn, parasattylyqpen, jańashyldyqpen taba bilýde.
Qymbatty Nursultan Ábishuly! Sizdiń sál syrqattanyp qalǵanyńyz bizdi biraz mazasyzdandyrǵanyn jasyrmaımyz. Biz Sizge barlyq kezde de tilektes boldyq. Tileýles bola beremiz. Qandaı syrqattan da sergektikpen, kóterińki kóńil-kúımen, jedel jeńetinińizge senemiz. Sizge myqty densaýlyq, baq-bereke tileımiz!», - delingen óńir ardagerleri men zııalylarynyń hatynda.