Túrkistan oblysynyń ákimi jaıylymdy jón josyqsyz bergen ákimderdi qatań synǵa aldy
TÚRKІSTAN. QazAqparat - Túrkistan oblysynda jaıylym jerler máselesin sheshý úshin onyń kólemin ulǵaıtý qarastyrylýda. Oblys ákimdigi spýtnıktik derekter negizinde aýyl sharýashylyǵy maqsatyndaǵy jer monıtorıngisiniń jańa tehnologııalaryn paıdalana bastady, dep habarlaıdy QazAqparat tilshisi.
Oblys aýmaǵyndaǵy jaıylym jerlerdi anyqtaý boıynsha kosmomonıtorıng júrgizilip, tsıfrlyq tehnologııalar men ádisterdiń keń múmkindikteri qoldanylýda. Josyqsyz jer paıdalanýshylarǵa baqylaý kúsheıtilgen. Kosmomonıtorıng kórsetkishteri oblys ákimi Ómirzaq Shókeevtiń tóraǵalyǵymen ótken apparat otyrysynda talqylandy. Aımaq basshysy keı aýdandarda oryn alǵan jer ıeleriniń áreketin jáne oǵan jol bergen ákimderdi qatań synǵa aldy. Jer zańnamasyn buzý derekteri boıynsha shara qoldanýdy jáne máseleni sheshýdi tapsyrdy.
«Oblys aýmaǵynda jerdi qazyp tastaǵan jaǵdaılar jıilep ketti. Nege ákimder qaramaıdy? Bul degenińiz – tabıǵatqa qııanat qoı. Ol jerge mal túsip, mertigip jatyr. Ony toqtatý kerek. Qazyp tastaǵan jerlerdi retteý kerek. Barlyq ákimderge tapsyrma», – dedi oblys ákimi Ómirzaq Shókeev.
Egistikke mal túspes úshin shuńqyr qazyp tastaǵan azamattarǵa shara qoldaný maqsatynda oblystyq jer ınspektsııasyna arnaıy hat joldanǵan. Ǵaryshtan monıtorıng júrgizý barlyq jerdi qamtıdy jáne ony paıdalaný men túsimdilik, tipti sý tutynýdy anyqtaýǵa múmkindik beredi. Sonymen qatar, jer paıdalanylmaı nemese maqsatyna sáıkes paıdalanylmaı jatqan jaǵdaılardy anyqtaıdy. Igerilmegen jerdi memleketke májbúrlep qaıtarý kózdelgen. Jerdi qatarynan 2 jyl boıy paıdalanylmaǵan jaǵdaıda, aıyppul salynady, jáne jer salyǵy 10 ese ulǵaıtylady. Oblys boıynsha jaıylym tapshylyǵy bar 152 eldi mekender anyqtaldy. Jyl sońyna deıin jalpy paıdalanýǵa 130 myń ga jer ótedi. Osylaısha, halyqtyń paıdalanatyn jaıylym jerdiń kólemi 742 myń ga nemese 21% artýy kútilýde. Zań jobasynda memleketke qaıtarý merzimin eki jyldan bir jylǵa deıin qysqartý qarastyrylǵan. Jaıylymdar alańdaryn ulǵaıtýǵa baǵyttalǵan jumystar jalǵasýda. Otyrysta sondaı-aq, oblys aýmaǵyndaǵy koronavırýs ınfektsııasy men sanıtarlyq-epıdemıologııalyq jaǵdaı týraly baıandaldy. Jaǵdaı turaqty. Búgingi kúnge deıin 176 myńnan asa adam 1-shi komponentpen vaktsına qabyldady. Pandemııa bastalǵǵaly 700 myńnan astam adamnan PTR synaǵy alynǵan.
