Túrkistan oblysynyń ákimi tasqyn sý kirgen eldi meken turǵyndarymen kezdesti

Búgin tańerteń Túrkistan óńirinde birneshe eldi mekendi sý basyp qalǵanyn buǵan deıin habarlaǵan bolatynbyz. Tasqyn sý aǵyny áli kelip jatyr. Jekelegen aýylda turǵyndar úılerinen evakýatsııalandy.

Darhan Satybaldy Saýran aýdany men Kentaý qalasyndaǵy sý basqan birneshe eldi mekendi aralap, turǵyndarmen kezdesti. Orańǵaı, Qusshy ata aýyldaryn aralady. Kóshelerden sý aǵyzý jumystaryn kórdi. Tótenshe jaǵdaı departamentiniń ókilderimen birge jergilikti turǵyndarmen júzdesti.

«Jaýyn-shashynnyń mólsherden tys kóp túsýi, aýa raıynyń kúrt jylynyp, qardyń erýi osy jaǵdaıǵa ákeldi. Turǵyndardyń qaýipsizdigi men amandyǵy mańyzdy. Bul jaǵdaıda sabyr kerek. Eń bastysy, el aman. Barlyq aýdan, qaladaǵy jaǵdaı baqylanyp, tıisti jumystar atqarylyp jatyr. Irrıgatsııalyq júıeler ashylyp, kanaldar tazartylǵan. Jaǵdaı baqylaýda», – dedi Darhan Satybaldy.

Qazir Qarnaq aýylynda qarǵyn sýdy bógep, baǵytyn burý jumysy júrip jatyr. Turǵyndar halyq arasynan tabylǵan oblys ákimine rızashylyq bildirip, sý tasqyny zardabyn joıý jumystary boıynsha usynystaryn jetkizdi.

Darhan Satybaldy Saýran aýdany Shaǵa aýylyndaǵy birneshe aýmaqtyda aralap kórdi. Jaýyn-shashynnyń toqtaýyna baılanysty sý deńgeıi tómendegen. Degenmen qaýipsizdik sharalary kúsheıtiledi.

Túrkistan oblysy Tótenshe jaǵdaılar departamentiniń bastyǵy Nurǵalı Júnisovtiń aıtýynsha, jańa jyldan beri sý tasqynynyń aldyn alý baǵytynda júıeli jumys júrgizilgen. Ákimdikter men departamenttiń birlesken is-áreketi arqyly jaǵdaı baqylaýǵa alynyp otyr.

Qazir óńirdiń sý basý qaýpi bar aımaqtary men sý nysandarynda 24 saǵattyq kezekshilik uıymdastyryldy. Sýdyń deńgeıi jáne eldi mekenderdi qarǵyn sýdan saqtaý jumystary turaqty baqylaýǵa alyndy.

Aıta keteıik, mol jaýǵan jańbyr men qardyń jyldam erýinen qalyptasqan tasqyn sý Báıdibek, Saýran, Ordabasy aýdandaryndaǵy birneshe aýylǵa kirdi.

Oblys ákimdigi usynǵan sońǵy málimetterge sáıkes, qazir 19 eldi mekendegi kósheler men aýla ýchaskeleri arqyly sý aǵyp jatyr. Qazirgi tańda 21 kóshe, 234 aýla, 1 jeke úıge sý kirgen. TJD kúshimen sý basqan aýla aýmaǵynan 200-den astam adam evakýatsııalandy. Barlyǵy týystarynyń úılerine ketti. Halyqty evakýatsııalaý jáne ýaqytsha ornalastyrý úshin Saýran aýdanynda 4 evakýatsııalyq pýnkt daıyndaldy. Sý tasqyny saldaryn joıýǵa barlyǵy 300-den astam adam, 100-ge jýyq tehnıka, 28 motopompa jumyldyryldy. Sonymen birge basqarmalar men kásipkerler arqyly ondaǵan tehnıka kómekke keldi.

Jaýapty organ basshylarynyń shtab otyrysynda sarapshylar atap ótkendeı, birneshe aıdan beri óńirde júrgizilgen aldyn alý jumystarynyń nátıjesinde tasqyn sýdan keler alapat apatqa jol berilgen joq. Jalpy jyl basynan oblys ákimi Darhan Satybaldynyń tapsyrmasymen barlyq aýdan, qalada sý tasqynyna qarsy jumys kúsheıtilgen bolatyn. Másele turaqty talqylanyp, árbir aýdan, qala ákimine naqty mindetter júkteldi. Aýa raıynyń aldyn ala boljamy nazarǵa alynyp, aryqtar men kanaldar tazartyldy. Tótenshe jaǵdaı departamenti men jergilikti ákimdikke qarasty tehnıkalar daıyndyqqa keltirildi.