Túrkistan oblysynyń ákimi Ózbekstandyq delegatsııamen kezdesti
TÚRKІSTAN. QazAqparat - Túrkistan oblysynyń ákimi Janseıit Túımebaev ózbek etnosynyń tili, mádenıeti jáne salt-dástúri kúnine arnalǵan merekelik shara aıasynda Ózbekstan Respýblıkasynan kelgen delegatsııa ókilderimen jáne QR Parlamenti depýtattarymen kezdesti, dep habarlaıdy QazAqparat tilshisi.
Basqosýǵa QR Parlamenti Májilisiniń jáne Ózbekstan Respýblıkasy Joǵarǵy Májilisiniń depýtattary, kórshi eldiń Mınıstrler keńsesi Halyqaralyq baılanystar jáne shet memlekettermen dostyq baılanystar ornyqtyrý keńesiniń músheleri, Ózbekstannyń zııaly qaýym ókilderi jáne QR Sh.Shaıahmetov atyndaǵy ulttyq ǵylymı-praktıkalyq ortalyǵynyń jetekshisi, oblystyq Qazaqstan halqy Assambleıasynyń ókilderi men oblystyq ózbek etnomádenı birlestiginiń músheleri qatysty.
Kezdesý barysynda alǵashqy bolyp sóz alǵan aımaq basshysy Ózbekstannan kelgen qonaqtarǵa eki baýyrlas elder arasyndaǵy rýhanı, mádenı, ekonomıkalyq baılanystardyń nyǵaıa túsetinin jetkizdi. Baýyrlas ózbek halqy irgeles jatqan qońsy ǵana emes, etjaqyn aǵaıyn ekenin atap ótti.
«Sońǵy 1,5 jyldyń ishinde Qazaqstan men Ózbekstan arasynda dostyq baılanystar bekip, jańa deńgeıge kóterildi. Temirjol tasymaly 44 paıyzǵa artyp, taýar aınalymy 2 mıllıard dollarǵa jetti. Táýelsizdik jyldarynda egizdiń syńaryndaı bolǵan elderdiń basshylary talaı tolymdy kezdesýler ótkizip, baýyrlastyqtyń bútindigin, kórshilik baılanystyń kemeldigin kórsetti. Qazaqstan men Ózbekstan arasyndaǵy mádenı-ekonomıkalyq baılanystardy nyǵaıtý Siz ben bizge júktelip otyrǵan asyl mindet. Osy oraıda aldaǵy ýaqytta birlese atqaratyn aýqymdy is-sharalar jeterlik dep oılaımyn», - dedi Janseıit Túımebaev.
Ózbekstannan kelgen delegatsııa atynan Ózbekstan Respýblıkasy Joǵarǵy Májilisiniń depýtaty Rasýl Kýsherbaev sóz sóılep, oblys basshylyǵyna ózbek halqynyń ulttyq qundylyqtaryn ulyqtaýǵa arnalǵan aıtýly sharany qolǵa alyp jatqanyna alǵys bildirdi. Sondaı-aq, QR ózbekteriniń «Dostyq» qaýymdastyǵy oblys ákimi Janseıit Qanseıitulyn «Qoǵam Belsendisi» tósbelgisimen marapattady.
