Túrkistan oblysynyń ákimi mektep qurylysyn sozbalańǵa salǵan merdigerge qatań talap qoıdy
Jańa oqý jyly jaqyndaǵanyna qaramastan bilim uıasynyń qurylysy áli aıaqtamaǵan «Shańyraq» JShS basshysyna 1 apta ýaqyt berildi. Óz mindettemelerin oryndaı almaǵan jaǵdaıda shara qoldanylady, is sotqa beriledi.
«Álińiz kelmeı me, tapsyryńyz. Osynshama ýaqyt sozyp, endi syltaýmen toıdyrmaqsyz. Siz 1 300 balany dalada qaldyraıyn dep otyrsyz. Memleket qarajatyn alyp, halyqty aldap otyrsyz. Shamańyz kelmese nege alasyz? Biz úshin ár sát qymbat. Sizge sońǵy múmkindik beriledi. Bir apta. Atústi júrip jumys istegen soń, sapa da ońbaıdy. Sapasyn baqylaý kúsheıtiledi», - dedi Darhan Satybaldy.
Qurylys kompanııasy kúrdeli jóndeýdi osydan 1 jyl buryn bastaǵan. Osyǵan deıin jumysty jyldamdatý týraly talaı ret eskertý alǵan. Oblys ákimi jumysshylardan jalaqysy týraly surady. Eger der kezinde almaǵan bolsa, jaýaptylarǵa jaǵdaıdy tekserýdi tapsyrdy.
Kókterek kentindegi №16 I.Panfılov mektebiniń ótken jyldyń qazan aıynda bastalǵan kúrdeli jóndeý jumystary bıyl tamyz aıynyń sońynda aıaqtalýy tıis. Qurylystyń jalpy quny – 247,3 mln teńge.
Aıta keteıik, Túrkistan oblysynda bilim berý salasynda 1 myń mektep bar. Bıyl oblystyń adamı áleýetti damytý basqarmasyna qarasty 21 mekemede kúrdeli jóndeý jumystary júrgizilip jatyr.
