Túrkistan oblysynyń ákimi Maqtaaraldaǵy tótenshe jaǵdaıdy áýeden baqylap qaıtty

MAQTAARAL. QazAqparat – Túrkistan oblysy Maqtaaral aýdanyndaǵy qalyptasqan tótenshe jaǵdaıdy oblys ákimi Ómirzaq Shókeev áýeden baqylap kórdi. Aımaq basshysy oblystyq TJD bastyǵy Nurǵalı Júnisovpen birge qaýiptiń aldyn alý máselelerin talqylady, dep habarlaıdy QazAqparat tilshisi.

«Qazir endi Ózbekstan mınıstriniń resmı málimdemesine sáıkes, sý basqan óńirdiń barlyǵyn qaıtadan aralap, kórip shyǵamyz. Eger taǵy sý basý qaýpi bolmasa, ondaǵy barlyq turǵyn úılerdi polıtsııa qorǵaıdy. Ázirge turǵyndardyń maly qaýipti aımaqtan túgel shyǵaryldy. Eshqandaı shyǵyn joq. Barlyǵy uıymdasqan túrde rettelip, óz qalpyna keledi. Bul - jergilikti aýqymdaǵy tótenshe jaǵdaı. Sondyqtan bul jerde Arystaǵy tájirıbege saı algorıtmde jumys isteımiz. Bári uıymdasqan túrde retteledi, qalpyna keledi. Bul tótenshe jaǵdaıdy ıgerýge oblystyń tolyq múmkinshiligi bar»,- dedi Ómirzaq Shókeev.

Esterińizge sala keteıik, 1 mamyrda Sardoba sý qoımasy bógetin sý shaıyp ketýine baılanysty Ózbekstannyń Syrdarııa oblysyndaǵy eldimekendi sý basty.

Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý syrtqa jaıylyp, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobıl jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.

Sondaı-aq Túrkistan oblysynda sý tasqyny qaýpi tóngen 3 aýyldyń halqy evakýatsııalanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaıdy retteýge aımaqtyń tolyq múmkindigi bar ekenin aıtty.