Túrkistan oblysynyń ákimi Qytaıdyń Hýbeı provıntsııasynan kelgen delegatsııamen kezdesti

TÚRKІSTAN OBLYSY. QazAqparat -Túrkistan oblysynyń ákimi Janseıit Túımebaev Qytaı Halyq Respýblıkasynyń Hýbeı provıntsııasynan kelgen delegatsııamen kezdesti. Hýbeı provıntsııasynyń Halyq ókilderi jınalysy janyndaǵy turaqty komıteti dırektorynyń orynbasary Van Lıngpen bolǵan júzdesýde aımaq basshysy Qazaqstan men Qytaı memleketteriniń dostyq qarym-qatynasy jaıyn sóz etti, dep habarlaıdy QazAqparat.

Taraptar sondaı-aq Túrkistan oblysymen aradaǵy saýda-ekonomıkalyq baılanystardyń joǵary deńgeıde damyp kele jatqanyna toqtaldy.

«Ózderińizge belgili, 2017 jyl "QR-daǵy QHR-diń týrızm jyly" bolyp jarııalandy. Osy sharanyń aıasynda byltyr Ońtústik Qazaqstan oblysynda «Ontustik Tourism. Invest - 2017: Uly Qytaı qorǵanynan Uly Jibek jolynyń júregine deıin» halyqaralyq forýmy ótti. Nátıjesinde, Beıjińde vıza ortalyǵy ashylsa, Astanada Qytaı memlekettik týrızm basqarmasynyń ókildigi jumysyn bastady. Biz bul jumystardy odan ári jalǵastyrýǵa daıynbyz. Ásirese, qos taraptyń týrızm salasyndaǵy jumysy jandansa jan-jaqty qoldaýǵa ázirmiz», - dedi Janseıit Túımebaev.  

Basqosýda, óńir basshysy aspan asty eliniń ókilderin óńdeý ónerkásibi, munaıgaz, munaı-hımııa, mashına jasaý, elektrotehnıka, qurylys, aýyl sharýashylyǵy ónimderin óńdeý syndy salalarda birlese jumys isteýge shaqyrdy. Kórshiles elden kelgen jumys tobyn basqara kelgen Van Lıng hanym atalǵan salalar aıasynda yntymaqtastyq ornatýǵa daıyndyǵyn bildirdi.

Aıta keteıik, búginde Qazaqstan men Qytaı memleketteriniń túrli salalardaǵy birlesken 51 jobasy júzege asyrylyp jatsa, onyń beseýi Túrkistan oblysy men Shymkent qalasynyń enshisinde.