Túrkistan oblysynyń ákimi kóshbasshy jastarmen kezdesý ótkizdi
Óńirdegi jastardyń jetken jetistikteri men sheshýdi qajet etetin túıitkilder áńgime arqaýyna aınalǵan basqosýda Janseıit Túımebaev jas býyn ókilderin eldiń damýyna óz úlesin qosyp, belgili-bir ispen aınalysýǵa shaqyrdy. Jasandylyqtan aýlaq júrip, úsh tilde bilim alý qajettigin atap ótti. Óziniń stýdenttik kezin eske alǵan ákim jaqsy ádetterge sol jastyq shaqtan beıim bolý kerektigine toqtaldy. Al, keler jyly Túrkistanda iri kólemdi halyqaralyq is-sharalar ótetinin atap ótti.
«Elbasy Nursultan Nazarbaev halyqqa arnaǵan Joldaýynda 2019 jyldy «Jastar jyly» dep jarııalady. Qazirgi tańda Jastar jylyn ótkizý jónindegi el Úkimeti jol kartasyn ázirleýde. Bul jobaǵa Túrkistan qalasynda ótetin iri kólemdi halyqaralyq is-sharalar engizilýde. Máselen, keler jyly Ortalyq Azııa elderi jastarynyń forýmy, Túrkitildes memleketter jastarynyń kongresi uıymdastyrylmaq. Sondaı-aq oblystaǵy ár aýdannyń belsendi jastary aı saıyn «Túrkistanǵa tartý» atty shyǵarmashylyq sharalar ótkizilmek», - dedi Janseıit Túımebaev.
Jıynda óńirdiń belsendi jastary men Qyrǵyzstan Respýblıkasynan kelgen stýdentter sóz sóılep, zamandastaryna jan-jaqty jaǵdaılar jasalyp jatqanyna alǵys bildirdi. Máselen, «Qazaqstannyń 100 jańa esimi» jobasynyń jeńimpazy, Dúnıejúzilik toǵyzqumalaq federatsııasy sportshylarynyń jetekshisi, toǵyzqumalaqtan álemniń 7 dúrkin chempıony Ásel Dálıeva jetken jetistikterin jastarǵa kórsetilgen qoldaýmen baılanystyrady.
«Qazirgi tańda óńirimizdiń jastary túrli salalardaǵy baıqaýlar men saıystarda bıik belesterdi baǵyndyryp júr. Bul rette, jastarǵa jasalyp jatqan qoldaýdyń mańyzy orasan zor. Búginde jatyqtyrýshynyń da qyzmetin qosa atqarýdamyn. Munyń barlyǵy Sizdiń bizderge degen senimińiz, jas sportshylardyń boıyna artylǵan úlken úmit. Oblys ortalyǵynyń Túrkistan qalasyna aýysýy toǵyz qumalaq sport túriniń odan ary jandanýyna múmkindik beretinin aıtqym keledi», - dedi Ásel Dálıeva.
Jıynǵa qatysqan jastar, sondaı-aq qazirgi tańda ózderin qandaı máseleler mazalap otyrǵanyn jetkizdi. Aıta keteıik, Túrkistan qalasynda bastalǵan jastar forýmy «Tereń tarıhtan - jarqyn bolashaqqa!» atty respýblıkalyq pikirsaıys týrnırimen bastaý aldy. Sondaı-aq forým qatysýshylary Túrkistan qalasyndaǵy «Qoja Ahmet ıAsaýı» kesenesi, Saýran qalashyǵy jáne Otyrar aýdanyndaǵy «Arystan bab» kesenesi, «Rýhanııat Ábý-Nasyr Ál-Farabı» murajaıy, «Kóne Otyrar tóbe» qalashyǵyn aralap, tarıhymen tanysady dep kútilýde. Budan bólek, forým aıasynda jastarǵa arnalǵan «IntellectGAME» zııatkerlik oıyndary jáne halyqaralyq «Jaıdarman» saıysy ótkizilmek. Oǵan Qyrǵystan, Ózbekstan, Bashqurstan, Tatarstan, Túrikmenstan, Túrkııa Respýblıkalarynyń qurama komandalary jáne elimizdiń ázilkeshteri qatysady dep josparlanǵan.
