Túrkistan oblysynyń ákimi qaıǵyly jaǵdaıǵa ushyraǵan áýletke bardy
Oblys ákimdigi baspasóz qyzmetinen málim etkendeı, ákim Syrdarııa ózeninde bolǵan oqys oqıǵa saldarynan qaıǵy jamylǵan áýlettiń ata-anasyna, et jaqyndaryna kóńil aıtty. Qaıǵylaryna ortaqtasyp, Quranǵa qatysty. Tıisti kómek kórsetip, qajettiliginshe qoldaý uıymdastyrý júrgiziletindigin jetkizdi.
Otyrar aýdanynda bir áýletten shyqqan 4 otbasynyń múshesi darııaǵa demalýǵa kelip, sońy qaıǵyly jaǵdaımen aıaqtaldy. Búginde sýǵan batqan 11 adamnyń 9-y tabylyp, janazasy shyǵarylyp, jer qoınyna tapsyryldy. Oqys oqıǵaǵa oraı Tótenshe jaǵdaılar departamenti janynan jedel shtab qurylyp, qutqarýshylar, aýdan ákimdigi men orman sharýashylyǵy jáne eriktiler joldanyp, birden izdestirý sharalaryna kiristi. Másele oblys basshysy Darhan Amangeldiulynyń tikeleı baqylaýyna alynyp, tıisti úılestirý jumystaryn júrgizdi.
Atalǵan jerde bolyp, tıisti kómekter uıymdastyryldy. Іzdestirý sharalaryna jalpy 150 brıgada, 16 tehnıka, 6 júzý quraly jumyldyryldy.
Qutqarýshylar men eriktiler turǵyndarǵa jaz boıy bul jerge sýǵa túsýge bolmaıtyny jaıly jan-jaqty eskertý júrgizgen. Anyqtalǵandaı, mundaı túsindirý jumystaryna dál osy áýlet te qatysqan. Alaıda ruqsat etilmegen orynda shomylýdyń zardaby men saqtyq sharalaryn eskermeýdiń saldary osyndaı jaǵdaıǵa ulasyp otyr.
