Túrkistan oblysynyń ákimi búrkitshi Aısholpanǵa 1 mln teńge tabys etti
TÚRKІSTAN. QazAqparat - Álemge tanymal búrkitshi qyz Aısholpan Nurǵaıypqyzy búgin Shardarada ótken halyqaralyq «Safari Shardara» festıvaline qatysty.
Túrkistan oblysynyń ákimi Janseıit Túımebaev Baıan-Ólgeı aımaǵynan kelgen arýǵa ulttyq sportty damytýǵa qosqan úlesi úshin 1 mln teńge kólemindegi aqshalaı syılyqty tabystady, dep habarlaıdy QazAqparat tilshisi.
«Aqqala» demalys aımaǵynyń jaǵalaýynda ótken sharada búrkitshiler jınalyp, saıatshylyq ónerdiń ozyq úlgisin kórsetti. Solardyń qatarynda Aısholpan Nurǵaıypqyzynyń óneri jınalǵan kópshilikti tánti etti. Óz kezeginde búrkitshi qyz da búgingi sharanyń erekshe ótkenin aıtty.
«Sýdyń jaǵalaýyndaǵy jarys óte əserli eken. Bizdiń jaqqa da Altaıǵa myńdaǵan týrıster keledi. Qazaqtyń kóshpeli ómiri olarǵa qyzyq. Mynadaı festıval jıi ótse, týrıster turaqty kelýge tyrysady»,- deıdi 15 jastaǵy búrkitshi.
Búginde Mońǵolııanyń Baıan-Ólgeı aımaǵynda turatyn Aısholpan kóshpeli ómirdiń sımvolyna aınalǵan. Búrkit baptaıtyn qazaq qyzyn kórý úshin jyl saıyn bul óńirge 2 myńǵa tarta saıahatshy keledi eken.
Osyǵan deıin Túrkistan oblysynda halyqaralyq «Safari Shardara» festıvali ótkendigin habarladyq.
