Túrkistan oblysynyń ákimi bir top ardagerlerimen kezdesti
TÚRKІSTAN. QazAqparat - Túrkistan oblysynyń ákimi Janseıit Túımebaev Qarttar kúni qarsańynda bir top ardagerlerimen kezdesti. Basqosýda aımaq basshysy el aǵalaryn merekemen quttyqtap, oblys ortalyǵyn rýhanı turǵydan damytýǵa birlesip atsalysýǵa shaqyrdy, dep habarlaıdy QazAqparat tilshisi.
Kezdesý barysynda óńir basshysy Túrkistandy túletýge Elbasymyz aıryqsha nazar aýdaryp otyrǵanyn atap ótti.
«Oblys ortalyǵy aldaǵy ýaqytta jańa keıipke enedi. Aldaǵy ýaqytta Túrkistanda jańa ǵımarattar, turǵyn úıler, áýejaı, ákimshilik iskerlik ortalyq boı kóteretin bolady. Túrki dúnıesiniń ortalyǵy retinde barlyq jaǵynan saı bolmaq . Sonymen qatar, Túrkistan - rýhanııattyń, mádenıettiń ordasy bolýy tıis. Bul turǵyda el aǵalaryna, aqsaqaldarǵa artylar júk aýyr", - dedi Janseıit Túımebaev.
Oblys basshysy sondaı-aq, mereke qarsańynda ardagerlerge demalys aımaqtaryna joldama syılady. Olardyń qatarynda Túrkistan oblysynyń Aqsaqaldar alqasynyń tóraǵasy Jarylqasyn Áziretbergenov, Túrkistan qalasynyń Aqsaqaldar alqasynyń múshesi Jumadil Kishibaev, Túrkistan qalasynyń qoǵamdyq kelisim keńesiniń múshesi Rústem Kamılov syndy 20-ǵa jýyq ardager bar.
