Túrkistan oblysynyń ákimi aımaq turǵyndaryna úndeý jarııalady
TÚRKІSTAN. QazAqparat – Túrkistan oblysynyń ákimi Ómirzaq Shókeev aımaq turǵyndaryna úndeý jarııalady. Aımaqta koronavırýs indetin juqtyrǵan 5 azamattyń tirkelýin aıtqan oblys basshysy «COVID-19» vırýsynyń taralýyna baılanysty qaýipsizdik sharalary kúsheıtilgenin atap ótti, dep habarlaıdy QazAqparat tilshisi.
Óńir basshysy vırýstyń taralýyn boldyrmaý maqsatynda oblys aýmaǵynda barlyq azamattar medıtsınalyq betperde kıip júrýi kerektigin jetkizdi. Dúkender men qoǵamdyq oryndarda betperdesiz júrýge tyıym salynatynyn eskertti. Onda arnaıy zalalsyzdandyrý quraldary ornatylyp, turǵyndar úıden tek qana azyq-túlik pen dári-dármek alýǵa nemese jumysqa barý úshin shyǵýy kerektigi eskertildi. Otbasylyq merekeler men toı-jıyndardy ótkizýge qatań tyıym salynady.
«Epıdemıolog mamandar tarapynan búgin tirkelgen aýrý oshaqtarynda zalalsyzdandyrý, baılanysta bolǵandardy tabý jáne oqshaýlaý boıynsha epıdemııaǵa qarsy is-sharalar uıymdastyryldy. Infektsııa tabylǵan Ábdihalyq aýyly men Jetisaı qalasyndaǵy móltekaýdanda karantın jarııalandy. Jetisaı aýdanyna dezınfektsııa, densaýlyq saqtaý, áleýmettik qorǵaý salasynan arnaıy mamandardan qurylǵan mobıldi top jasaqtap, jiberildi», - dedi Ómirzaq Shókeev.
Aımaq basshysy sondaı-aq, qosymsha kómek retinde medıtsınalyq jabdyqtar men kólikter daıyn ekenin aıtty. Aýdanda ınfektsııa oshaǵy men qoǵamdyq oryndarda aýqymdy dezınfektsııa jumystary júrgiziletinin málimdedi. Іndettiń taralý qaýpi joǵary bolǵandyqtan, oblys ákimi turǵyndardy tótenshe jaǵdaıǵa baılanysty qabyldanǵan sharalarǵa túsinistikpen qarap, tıisti tártiptik sharalardy saqtaýǵa, dárigerlerdiń nusqaýlyqtaryn buljytpaı oryndaýǵa shaqyrdy.
«Ózge aýdandardan ınfektsıonıst jáne reanımotologtardan quralǵan 6 brıgada Jetisaıǵa joldandy. Oblystyń Bas ınfektsıonıst dárigeri aýdanda osy sharalarǵa basshylyq etedi. Kerekti tósek-oryndar, gospıtaldar tolyq daıyn. Oblys ákiminiń tapsyrmasymen, polıtsııa, Tótenshe jaǵdaı departamenti, Ulttyq qaýipsizdik komıteti, prokýratýra, densaýlyq saqtaý salasymen birlese otyryp, shuǵyl túrde karantın jarııalanǵan eldi mekender shekarasyna blok beketter qoıylýda. Tótenshe jaǵdaı rejimin buzǵan azamattar zań aıasynda jaýapqa tartylady.
Ómirzaq Shókeev sondaı-aq, turǵyndardy áleýmettik jelilerdi sharlaǵan ártúrli aqparattarǵa senbeı, tek memlekettik organdar taratqan resmı málimettermen ǵana tanysýǵa shaqyrdy.
«Qurmetti jerlester! Dál qazir búkil álem qıyn kezeńde tur. Alaıda, biz bul qıyn-qystaý ýaqyttan da birlik pen yntymaqtyń arqasynda aman-esen ótemiz dep senemin! Qazirgi tańda bizge tynyshtyq kerek, jalǵan aqparattarǵa senbeńizder. Resmı aqparatqa ǵana senińizder. Biz kúndelikti jaǵdaıdy qatań baqylaýda ustap otyrmyz»,-dedi Ómirzaq Estaıuly óz úndeýinde.
