Túrkistan oblysynyń ákimi Asqar Mamınnan birqatar máselelerge qoldaý kórsetýdi surady

TÚRKІSTAN. QazAqparat -QR Premer-Mınıstri Asqar Mamınnyń tóraǵalyq etýimen ótken jıynda Túrkistan oblysynyń ákimi Ómirzaq Shókeev birqatar máselelerdi aıtyp, oǵan qoldaý kórsetýdi surady. Óńir basshysy Túrkistan qalasynyń shyǵys aýmaǵynan jańa aınalma joldy qarastyrýdy usyndy, dep habarlaıdy QazAqparat tilshisi.

«Oblys ákimdigi tarapynan Kentaý qalasy aýmaǵyn ındýstrıaldy-óndiristik aımaq retinde damytý barysynda áli de birqatar jumystar atqarylý kerek. Túrkistan qalasynyń shyǵys aýmaǵynan shamamen uzyndyǵy 30 shaqyrym, qurylys-montajdaý jumystarynyń quny 15 mlrd teńge bolatyn aınalma joldy qarastyrý týraly QR Indýstrııa jáne ınfraqurylymdyq damý mınıstrligine usynys joldanǵan bolatyn. Osyǵan qoldaý qajet»,- dedi Ómirzaq Shókeev.

Óńir basshysy sonymen qatar, jańadan salynatyn áýejaıǵa jol salý qajettigin atap ótti.

«Áýejaıǵa salynatyn avtomobıl jolynan «Kentaý» ındýstrıaldy aýmaǵyna baratyn joldyń qurylysy. Qazirgi tańda, áýejaıǵa baratyn 15,2 shaqyrym joldyń tehnıkalyq-ekonomıkalyq negizdemesi men jobalaý-smetalyq qujattamasy ázirlenip jatyr. Shaǵa aýyly tusynan áýejaıǵa salynatyn avtomobıl jolynan Qosqorǵan aýyly arqyly tikeleı Kentaý qalasyndaǵy ındýstrıaldy aımaqqa deıingi jalpy uzyndyǵy 24 shaqyrymdy quraıtyn jol qurylysyn júrgizý josparlanýda. Bul baǵyt arqyly júk kólikteri Túrkistan qalasy aýmaǵyna kirmeı tikeleı ındýstrıaldy aýmaqqa qatynaıtyn bolady. Atalǵan jol qurylysy Túrkistan oblysynyń 2024 jylǵa deıingi áleýmettik-ekonomıkalyq damý keshendi josparyna ózgeris engizý barysynda qarastyryldy. Jobany qoldaýyńyzdy suraımyn», - dedi Ómirzaq Shókeev.