Túrkistan oblysynyń ákimi ardagerlermen kezdesti
TÚRKІSTAN. QazAqparat - Túrkistan oblysynyń ákimi Ómirzaq Shókeev ardagerler men zııaly qaýym ókilderimen kezdesý ótkizdi. Óreli oı men salmaqty pikir aıtylǵan kezdesýge oblystyq máslıhat hatshysy Qaırat Balabıev, oblystyq ardagerler keńesiniń tóraǵasy Jeńisbek Máýlenqulov jáne Jetisaı aýdanynyń aqsaqaldary qatysty, dep habarlaıdy QazAqparat tilshisi.
Abyz aqsaqaldar men qazynaly qarııalarmen júzdesken oblys basshysy mundaı kezdesýlerdiń mańyzdylyǵyn erekshe atap ótti.
Sonymen qatar, barlyq másele mámilemen sheshiletinine toqtalyp, bıler keńesin jańǵyrtýdyń mańyzyn jetkizdi.
«Pandemııa kúndelikti ómirimizge óziniń yqpalyn tıgizip jatqany jasyryn emes. Biraq ákimshiliktiń, aýdan-qala ákimderi men memlekettik organdardyń jumysy bir mınýtqa, bir sekýndqa da toqtaǵan joq. Ony aqparat quraldarynan kórip otyrsyzdar. Odan keıin de talaı qıynshylyqtar men apattar boldy. Túrkistan qalasynda birneshe qurylys nysany salynyp jatyr, kórip otyrsyzdar. Aýdandarǵa barǵan kezde aqsaqaldarmen kezdesip turamyn. Burynǵydaı kópshilikpen, kóp jıynǵa qatysýǵa qazir tyıym salynǵanyn bilesizder. Endi osyndaı jıyndy uıymdastyra bastaımyz. Ár aýdannan aqsaqaldardy jınap, qandaı ońdy jaǵdaılar men qandaı kemshilikter bolyp jatqanyn talqylaımyz. Óıtkeni ardagerler eldegi jaǵdaıǵa qanyq. Mundaı basqosýdy Jetisaıdan bastaımyz. Ol jerde kóptegen jumystar jasaldy, ony bilesizder»,-dedi aımaq basshysy.
Karantın talaptaryn saqtaı otyryp ótkizilgen kezdesý barysynda aýdannyń áleýmettik-ekonomıkalyq damýy, qoǵamdyq-saıası turaqtylyqtyń saqtalýy máselesi ortaǵa salyndy.
Jetisaılyq aqsaqaldar óz oılaryn jetkizip, aýdannyń birqatar máselelerin kóterdi.
Jıyndy qorytyndylaǵan óńir basshysy barlyq usynystar eskerýsiz qalmaıtynyn, bılik pen qoǵam birlese jumys júrgizse aıtarlyqtaı nátıjege jetýge bolatynyn atap ótti.
Osy oraıda ardagerler men zııaly qaýym ókilderiniń áleýetin tıimdi paıdalaný kerektigin aıryqsha jetkizdi.
Aldaǵy ýaqytta oblys ákimi Ómirzaq Shókeev aýdan aqsaqaldarymen kezdesýdi dártúrli túrde ótkizilip turatyny aıtyldy.
