Túrkistan oblysynyń ákimi aqsaqaldarmen qordalanǵan máselelerdi talqylady
TÚRKІSTAN. QazAqparat – Túrkistan oblysynda az qamtylǵan otbasylar 500 mln teńgege demeýshilik kómek aldy. Bul týraly óńir basshysy Ómirzaq Shókeevtiń aqsaqaldarmen kezdesýinde málim boldy, dep habarlaıdy QazAqparat.
Tólebı aýdanyna jumys saparymen barǵan Túrkistan oblysynyń ákimi Ómirzaq Shókeev aýdan aqsaqaldarymen júzdesip, kúrdelengen máselelerdi ortaǵa saldy. Halyq pen bılik ókilderi birqatar máseleni talqylap, alda kele jatqan aýyl ákimderin saılaý naýqany týraly da sóz qozǵady.
«Qazaq eliniń mańdaıyna bitken Túrkistannyń kórkeıýi árbir jan úshin ólsheýsiz baqyt. Jaqynda ótetin aýyl ákimderiniń saılaýyn abyroımen atqaryp, el qamyn oılaıtyn, halyqtyń jaǵdaıyn jaqsartýǵa kúsh salatyn azamattardy tańdaýǵa qýana atsalysamyz», - dedi Tólebı aýdanynyń turǵyny Átirhan Shyńǵysbaev.
Oblys ákiminiń aqsaqaldarmen kezdesip, jergilikti máselelerdi talqylaýy dástúrge aınaldy. Kezdesýde sóz alǵan aqsaqaldar kez kelgen týyndaǵan jaǵdaıdy der kezinde talqylap, sheshimin tabýǵa bolatynyn aıtty.
«Ózderińizdeı aqsaqaldar, kópti kórgen qarııalar eldiń jaǵdaıyn bilip, shyndyqty, shynaıylyqty, bolyp jatqan tirlikti búkpesiz ashyq aıtady. Áńgime barysynda eldi alańdatqan máseleler aıtylady. Sondyqtan men úshin el aǵalarynyń oı - pikiri óte mańyzdy. Jasalyp jatqan isterge shynaıy kózqarastaryńyz ben aqyl - keńesterińizge qulaq asamyz. Ardagerler keńesimen tyǵyz baılanystamyz. Men úshin bul qoǵamdyq uıymnyń orny erekshe. Halyqtyń jaǵdaıyn sizderden artyq biletin jan joq dep oılaımyn. Alda kele jatqan aýyl ákimderiniń saılaýy eń aldymen, aýyl turǵyndarynyń múddesi úshin jasalyp jatqan saıası shara. Halyq tuńǵysh ret jergilikti atqarýshy bıliktiń basshysyn tikeleı saılaý múmkindigine ıe bolmaq»,- dedi aýdan aqsaqaldarymen kezdesken oblys ákimi.
Oblys ákimi óńirlik «Qamqorlyq» baǵdarlamasynyń barysyn qadaǵalaýdy tapsyrdy. Túrkistan oblysynda kómekke muqtaj 2000-ǵa jýyq otbasy bar. Demeýshiler esebinen barlyǵyna 500 mln teńgeden astam qarajattyń kómegi berildi. Oblys boıynsha osy baǵdarlama aıasynda 52 otbasy baspanaly boldy.
«Qamqorlyq» jobasy memleket tarapynan beriletin járdemaqy men kómekten bólek júzege asady. Eńbekke qaýqarly azamattardy jumyspen qamtyp, nemese jeke kásibin dóńgeletýge jaǵdaı jasalady. Turmys jaǵdaıy tómen otbasylarǵa qamqorlyq kórsetý arqyly, kedeılik sheńberinen shyǵýǵa múmkindik jasalady. Bul joba barlyq aýdandarda óz jalǵasyn tabady. Azyq-túlikten bólek, olardyń turyp jatqan úıiniń bitpeı turǵan tustaryna jáne aınalasyndaǵy tazalyq jumystaryna arnaıy eriktiler toby jumyldyrylady.
