Túrkistan oblysynyń ákimdigi: Jetisaıdaǵy Qoǵaly aýylyn sý basty degen aqparat jalǵan
TÚRKІSTAN. QazAqparat – Túrkistan oblysy Jetisaı aýdany Atameken aýyl okrýgindegi Qoǵaly aýylyn tasqyn sý basty degen aqparat shyndyqqa janaspaıdy, dep habarlaıdy QazAqparat Túrkistan oblysynyń óńirlik kommýnıkatsııalar qyzmetine silteme jasap.
Óńirlik kommýnıkatsııalar qyzmeti taratqan aqparattarǵa qaraǵanda, atalǵan aýyldaǵy 186 úıde turatyn 1400 turǵynnyń basym kópshiligi áıelder. Olar bala-shaǵalaryn alyp, búginde óz erikterimen Jetisaı qalasyndaǵy týǵan-týystarynyń úılerine ornalasqan.
Desek te, aýdan ákimdigi qaýipsiz aımaqqa kóshemin deýshilerge arnap úsh mektepti ázirlep, aýylǵa 50 oryndyq avtobýs ta qoıyp qoıǵan. Biraq aýyldyń er kisileri kóshýden óz erikterimen bas tartyp, eldi meken irgesindegi damba kóterý jumystaryna atsalsysýdy jón kóripti.
«Jetisaı aýdanynyń Ózbekstan Respýblıkasymen shekaralas ornalasqan Qoǵaly aýylyndaǵy jaǵdaıdyń buǵan deıin baqylaýda bolǵanyn eskertemiz. Atalǵan eldi mekende aýdan ákimdigi men tótenshe jaǵdaılar qyzmetiniń mamandary sý tasqynynyń aldyn alý sharalaryn júrgizip, damby turǵyzý, qum toly qapshyq qalaý jumystaryn atqarýda»,-delingen habarlamada.
