Túrkistan oblysynyń ákimdigi men basqarmalar qyrkúıek aıynda Túrkistanǵa kóshiriledi
TÚRKІSTAN. QazAqparat - Búgin Túrkistan oblysynda oblystyq máslıhattyń altynshy shaqyrylymynyń kezekten tys jıyrma jetinshi sessııasy ótti. Onda óńirdiń taıaýda bólinip, qaıta qurylǵan Jetisaı, Maqtaaral, Keles, Saryaǵash aýdandarynyń shekaralary bekitildi, dep habarlaıdy QazAqparat tilshisi.
Sessııa jumysyna qatysqan oblys ákimi Janseıit Túımebaev Elbasy N.Nazarbaevtyń qoldaýymen eki aýdannyń bólinýi halqy tyǵyz ornalasqan aýmaq úshin mańyzdy ekenine toqtaldy.
«Ótken aptadaǵy Úkimettiń otyrysynda atalǵan aýdandardyń shekarasyn bekitý týraly usynysymyz qabyldanyp, búgin máslıhattyń sessııasynda bekitip otyrmyz. Bul boıynsha tıisti jumystar júrgizildi. Qaıta qurylǵan Saryaǵash aýdanynyń aýmaǵy 417 myń gektardy qurasa, jańadan qurylǵan Keles aýdanynyń shekarasy 345 myń 129 gektardy, Jetisaı aýdanynyń aýmaǵy 104 myń 600 gektardy, al Maqtaaral aýdanynyń kólemi 80 myń 760 gektardy quraıtyn bolady. Osyǵan oraı, aýdan ákimderine tıisti jumystardy qolǵa alyp, uıymdastyrýdy tapsyramyn»,-dedi oblys ákimi.
Budan bólek, aımaq basshysy oblys ortalyǵy - Túrkistan qalasyna kóshý boıynsha qyzý jumystar júrgizilip jatqanyn aıtyp, qyrkúıek aıynda barlyq basqarmalarmen birge kóshetinin jetkizdi. Ol úshin shilde, tamyz aılarynda ákimdikke qarasty mekemeler men máslıhat apparaty ornalasatyn ǵımarattar daıyndalatynyn atap ótti. Jıyndy qorytyndylaǵan oblys ákimi joǵaryda atalǵan jumystardy birlese uıymdastyryp, Túrkistan qalasyna kóshýge bir kisideı atsalysýǵa shaqyrdy.
Sessııanyń barysynda birqatar halyq qalaýlylary «Astanaǵa 20 jyl» merekelik jáne «Oblysqa sińirgen eńbegi úshin» medalimen marapattaldy. Olardyń qatarynda Serikjan Seıtjanov, Eseı Órken, Áset Qaıypbekov, Qaırat Saparbaev, Murat Tóltebaev, Qaırat Súleımenov, Bekasyl Tólendıevalar bar. Al oblys ákiminiń Qurmet gramotasymen Rabıǵa Qýatbekova, Zýpparhan Chaldanov, Aınash Satıevalar marapattaldy.
