Túrkistan oblysynyń ákimdigi bes balasynan aıyrylǵan astanalyq otbasyǵa aqsha aýdardy
TÚRKІSTAN. QazAqparat -Túrkistan oblysy ákiminiń apparaty men basqarmalardyń qyzmetkerleri órtte bes balasynan aıyrylǵan astanalyq otbasyǵa birkúndik jalaqylaryn aýdardy. Bul týraly óńir ákimdiginiń baspasóz qyzmetinen málim etti, dep habarlaıdy QazAqparat tilshisi.
Oblys ákimi Janseıit Túımebaev bul orny tolmas qaza ekenin aıtyp, halyq balapandarynan qapııada kóz jazyp qalǵan otbasymen birge ekendigin jetkizdi.
Aımaq basshysy sondaı-aq oblysta kópbalaly jáne jas otbasylardy qoldaý baǵytyndaǵy jumystar kúsheıtiletinin atap ótti. Aıta keteıik, búginde Túrkistan oblysynda 134 myńnan astam kópbalaly otbasy bar. Batyr analardyń kóptigi jóninen de óńir elimizde kósh basynda. Máselen, oblysta 19 myńnan astam «Altyn alqa», 31 854 «Kúmis alqa» ıegerleri turady. Ol otbasylarǵa memleket tarapynan járdemaqylar men tıisti qoldaýlar der kezinde kórsetilýde. Sonymen birge, byltyr oblysta ana ólimi 35,9 paıyzǵa tómendedi. Bala týý kórsetkishi boıynsha da Túrkistan oblysy respýblıkada kósh bastap tur.
Eske salaıyq, 4 aqpan kúni túnde Astanadaǵy «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanadan órt shyqty. Órtti sóndirý barysynda 2006, 2008, 2014, 2016, 2018 jyldary týǵan 5 qyz balanyń denesi tabyldy. Qaıǵyly oqıǵa kezinde balalardyń ata-anasy túngi jumysta bolǵan. Aqpannyń 5-i kúni bes balany elordalyqtar aqtyq saparǵa shyǵaryp saldy. Elbasy Nursultan Nazarbaev Sıterler otbasyna kóńil aıtty.
Búginde el jurtshylyǵy bir mezette bes perzentinen aıyrylǵan otbasynyń qaıǵysymen bólisip, kómek qolyn sozýda.
