Túrkistan oblysynyń 823 medıtsına qyzmetkeri alys-jaqyn shetelde biliktiligin arttyrǵan

TÚRKІSTAN. QazAqparat – Túrkistan oblysy ákiminiń orynbasary Joldymurat Amanbaev medıtsına qyzmetkerlerin kásibı merekelerimen quttyqtap, eńbegimen daralanǵan aq jeleńdi abzal jandardy marapattady, dep habarlaıdy QazAqparat tilshisi.

Aq halatty abzal jandarǵa «Oblysqa sińirgen eńbegi úshin» tósbelgisin, «Eńbek ardageri» jáne «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» medaldary tabystaldy.

«Búkil álemdi dúrliktirgen pandemııamen kúreste sizderdiń eńbekterińiz eren. Qarýsyz maıdanda kúni-túni tynymsyz eńbek etip, talaı jandy ólimnen arashalap kelesizder. Sizderge myń alǵys aıtamyz»,-dedi oblys ákiminiń orynbasary.

Oblystyq qoǵamdyq densaýlyq saqtaý basqarmasynyń basshysy Marat Pashımov óz kezeginde medıtsına salasyn jetildirý maqsatynda, óńirde mamandardyń biliktiligin joǵarylatý júıeli túrde júzege asyrylyp jatqandyǵyn atap ótti.

«Kadrlardyń biliktiligin arttyrý jáne olardy qaıta daıarlaý» baǵdarlamasy boıynsha 2020 jyldyń 5 aıynda 823 maman biliktiligin arttyrdy. Onyń ishinde 44 maman Reseıdiń Novosıbırsk, Sankt-Peterbýrg qalalarynda biliktilikterin arttyryp, áriptesterimen tájirıbe almasty. Bıyldyń ózinde mamandardyń joǵary kásibı deńgeıleriniń arqasynda Túrkistan oblystyq klınıkalyq aýrýhanasynda 17 jáne oblystyq balalar aýrýhanasynda 80 kúrdeli ota jasalǵan. Emdeý mekemeleriniń medıtsınalyq qural-jabdyqtary da úzdiksiz tolyqtyrylýda. Bıyl jansaqtaý bólimsheleri 7 dana loporoskopııalyq hırýrgııaǵa arnalǵan vıdeoendoskoptyq jıyntyqpen, 9 dana ýltradybystyq júıelermen, 38 dana narkoz apparattary men ókpege jasandy dem berý qurylǵylary, 1 dana kompıýterlik tomograf qural – jabdyqtarymen jaraqtandyrylǵan. Jalpy, qazirgi tańda oblys boıynsha 5202 dáriger jáne 18120 orta býyn medıtsına qyzmetkeri jumys isteıdi. Qazirgideı qıyn-qystaý ári, ótpeli kezeńde ár qaısysynyń eńbegi eren, orny erekshe. Karantın rejımine baılanysty qalǵan medıtsına qyzmetkerleriniń marapattary jumys oryndaryna joldanǵan»,- dedi Marat Pashımov.

Oblys boıynsha bıyl «Densaýlyq saqtaý isiniń úzdigi» tósbelgisimen, «Densaýlyq saqtaý isine qosqan úlesi úshin» tósbelgisimen, «Qurmet gramotasy» jáne «Eńbek ardageri» medalimen, Alǵys hatpen jáne koronavırýs indetimen kúreste aldyńǵy shepte júrgen mamandar «Densaýlyq saqtaý isiniń úzdigi» men «Halyq alǵysy» medalimen 200-ge jýyq medıtsına qyzmetkeri marapattalyp otyr.